أول مركز بيانات في اقتصادية القناة.. استثمارات بـ270 مليون دولار
270 مليون دولار لأول مركز بيانات في اقتصادية قناة السويس.. استثمارات جديدة بتدخل قطاع التكنولوجيا في مصر، بعد ما أعلنت مجموعة "إنترو القابضة" عن مشروع مركز كيميت للبيانات في منطقة السخنة الصناعية المتكاملة التابعة للمنطقة الاقتصادية لقناة السويس.
المركز مستهدف يكون أول مشروع من نوعه داخل المنطقة الاقتصادية بتصنيف عالمي Tier III، والمرحلة الأولى من المشروع باستثمارات تصل لـ 270 مليون دولار.
أما القدرة الإجمالية المستهدفة للمركز، فهتوصل لـ 80 ميجاوات، عشان يخدم الشركات اللي محتاجة قدرات كبيرة في الحوسبة السحابية ومعالجة واستضافة البيانات.
ومركز "كيميت" مش مجرد مكان لتخزين البيانات، لكنه هيقدم خدمات الحلول السحابية وإنترنت الأشياء والتحول الرقمي، وده مع زيادة الطلب على الخدمات الرقمية في مصر والمنطقة.
واللافت إن المشروع دخل بالفعل في مراحل تنفيذية، مع الانتهاء من جزء من التصميمات الهندسية، وكمان إبرام تعاقدات مع موردين لتوفير المعدات والتجهيزات اللازمة.
والحكومة بتستهدف من النوع ده من المشروعات دعم نمو صناعة مراكز البيانات والحوسبة السحابية، وتحويل مصر لمركز إقليمي لاستضافة ومعالجة البيانات وخدمة الأسواق المحلية والإقليمية والدولية
