ليه المركزي بيسحب سيولة من البنوك؟.. هنقولك السر

فجأة، البنك المركزي سحب حوالي 537 مليار جنيه من البنوك.. والرقم ده مش قليل.. فهل المركزي بيجهز لقرار جديد؟ ولا الموضوع له علاقة بحاجة تانية في سوق السيولة؟ والسؤال الأهم.. ليه البنوك عندها كل السيولة دي من الأساس؟ وهل سحب 537 مليار جنيه ممكن يأثر على أسعار الفايدة؟

فاااصل

البنك المركزي سحب حوالي 537 مليار جنيه من فائض السيولة لدى 10 بنوك.. من خلال وديعة أسبوعية بعائد ثابت 19.5%.

والعملية دي زادت حوالي 7.5% عن العطاء السابق.. وده معناه إن السيولة الفائضة في الجهاز المصرفي لسه كبيرة.

طب المركزي بيعمل إيه بالسيولة دي؟

البنوك بتحط السيولة الزايدة عند البنك المركزي لمدة أسبوع وتحصل في المقابل على عائد ثابت.. والمركزي بيستخدم الأداة دي علشان يدير حجم السيولة في السوق ويحافظ على أسعار الفائدة قصيرة الأجل في المستوى المتوافق مع سياسته النقدية.. ومع عملية النهارده، إجمالي السيولة اللي سحبها المركزي من خلال الودائع الأسبوعية خلال سبتمبر وصل لحوالي 1.52 تريليون جنيه.

وهل سحب السيولة معناه إن الفايدة هتتغير؟

مش بالضرورة.. حجم الوديعة الأسبوعية ممكن يزيد أو يقل من عطاء للتاني حسب حركة السيولة، واستحقاقات أدوات الدين، وتدفقات الخزانة، ومراكز السيولة عند البنوك.

وعشان كده.. سحب 537 مليار جنيه لوحده مش مؤشر مؤكد على قرار لجنة السياسة النقدية.

خصوصًا إن اجتماع النهاردة هيحسم أسعار الفائدة، بعد ما المركزي ثبتها في الاجتماع السابق عند 19% للإيداع و20% للإقراض و19.5% لسعر العملية الرئيسية