بـ17 مليار دولار.. قصة الصفقة الأضخم في سيناء
بعد رأس الحكمة مصر بقت بؤرة وقبلة الاستثمار في الشرق الأوسط والمنطقة.. ايه الجديد في ملف الاستثمارات الأجنبية في مصر وايه حكاية صفقة الـ17 مليار دولار وإزاي المشروع هيغير موازين الطاقة النظيفة في المنطقة كلها.
مصر فتح فيها هويس الاستثمارات بعد تحرير سعر الصرف مارس اللي فات وصفقة رأس الحكمة الإماراتية في الساحل الشمالي واللي كانت صفقة الخير على الاقتصاد المصري ودا لأنها فتحت الباب قدام الاستثمارات الأجنبية والعربية وكمان كانت السبب في تعديل تصنيف مصر الائتماني وتعزيز الثقة في الاقتصاد المصري عند مؤسسات التمويل الدولية زي صندوق النقد الدولي والبنك الدولي وغيرها واللي أعادت الر ح لسوق الاستثمارات ودي حقيقة محدش يقدر ينكرها.
الاستثمار في الهيدروجين الاخضر من اكتر مجالات الاستثمار دلوقتي نشاط في العالم واللي بيدور على الطاقة النظيفة ومصر قدرت تستقطب صفقات ضخمة في قطاع الهيدروجين الاخضر من ساعة مؤتمر المناخ اللي استضافته وسمعنا عن أرقام ضخمة في المجال دا ومصر بتستهدف جذب استثمارات بقيمة 15 مليار دولار للمرحلة التجريبية لمشروعات إنتاج الهيدروجين الأخضر خلال الفترة بين سنة 2025 ولغاية 2030 ومن المقرر يبدأ تنفيذ المرحلة دي لعدد من المشروعات خلال النص الأول من 2026.
طيب ايه الجديد في مشروعات الهيدروجين الاخضر؟
في الساعات الأخيرة طرحت منصة الفرص الاستثمارية التابعة للهيئة العامة للاستثمار والمناطق الحرة مشروع ضخم لبناء أكبر مصنع للهيدروجين الأخضر في العالم ودا بالشراكة مع وزارة الإنتاج الحربي في جنوب سيناء بتكلفة 17 مليار دولار.. ايوا زي ما حضرتك سمعت كده الرقم هو 17 مليار دولار ودا بيخليه اكبر استثمار من نوعه في قطاع الطاقة النظيفة في مصر والشرق الأوسط كله..
المصنع الضخم هيكون لعلى مساحة 127 كيلومتر مربع وبطاقة إنتاج تصل إلى 400 ألف طن سنويا من الهيدروجين الأخضر ومن المقرر انتهاء المرحلة الأولى منه في 2030 والتانية في 2033 والثالثة في 2035 وانتاج المشروع هيكون طاقة نظيفة بنسبة 100% بشكل مستقل عن شبكة الكهرباء القومية بقدرة 3.1 جيجاوات و باستخدام الطاقة الشمسية خلال النهار والطاقة المائية المخزنة في الليل ودا هيسمح باستخدام المعدات على مدار الساعة طوال أيام الأسبوع.
المشروع بيستهدف كمان التصدير إلى أوروبا من خلال السفن وبيعتبر طاقة ووقود المستقبل وكل الدول يتنافس دلوقتي لجذب استثمارات جديدة في قطاع الطاقة الجديد لانه وقود واعد لمستقبل الطاقة المستدامة وصديق للبيئة لانه مش بيصدر عنه أي انبعاثات ضارة وكمان ميزته إن الهيدروجين متوفر بكثرة في الطبيعة ويمكن إنتاجه بشكل مستمر باستخدام مصادر الطاقة المتجددة ويمكن نقله عبر خطوط الأنابيب أو السفن، مما يسهل توزيعه على نطاق واسع.
