ترامب يهز عالم المال بقرار جريء.. ما هو احتياطي البيتكوين؟
إيه اللي بيحصل في العالم.. وإزاي ترامب بيغير قواعد المال والاحتياطي في العالم.. وليه أمريكا هستتغني عن الدهب في الاحتياطي.
في خطوة هزت أسواق المال والتكنولوجيا وقع الرئيس الأميركي دونالد ترامب أمر تنفيذي بإنشاء "احتياطي البيتكوين الاستراتيجي" في محاولة لإنشاء نسخة رقمية من فورت نوكس اللي بيحتفظ باحتياطي الدهب الأميركي.. القرار ده بييجي في وقت العالم كله بيراقب فيه صعود أسعار الدهب لمستويات قياسية وتزايد المخاوف الاقتصادية بسبب سياسات ترامب الجمركية لكن السؤال الكبير هل البيتكوين فعلاً ممكن يكون البديل الجديد للذهب ولا الخطوة دي مغامرة محفوفة بالمخاطر؟
الرئيس الأميركي قرر تمويل الاحتياطي بحوالي 200 ألف بيتكوين قيمتهم بتوصل لـ 17 مليار دولار وهي عملات صادرتها الحكومة الأميركية من قضايا جنائية ومدنية .. والاحتياطي ده هيكون مؤمن افتراضياً لفترة غير محددة وممكن يضاف عليه بيتكوين تاني طالما مش هيكلف دافعي الضرائب أي أموال إضافية لكن رغم ضخامة الإعلان القرار ملاقاش دعم كبير من المستثمرين وسعر البيتكوين نزل بعد الإعلان قبل ما يستقر تاني المحللين شايفين إن السبب في ده إن القانون الأميركي بيلزم الحكومة إنها ترجع البيتكوين المصادر للضحايا المتضررين من عمليات الاختراق زي اللي حصلت لمنصة Bitfinex سنة 2016.
فيه كمان تساؤلات عن إمكانية إضافة عملات رقمية تانية للاحتياطي وترامب لمح إنه ممكن يضم إيثريوم وإكس آر بي وسولانا وكاردانو وده بيخلي الموضوع مفتوح لاحتمالات كتير لكن المعارضين شايفين إن البيتكوين أصل شديد التقلب وملوش قيمة جوهرية زي الذهب فبالتالي ممكن يكون خيار مالي محفوف بالمخاطر في حين إن المؤيدين زي ستيفان إيفراه من كوين هاوس بيقولوا إن ندرة البيتكوين المحدودة بـ 21 مليون وحدة ممكن تخليه مخزن للقيمة زي الذهب وكمان الاحتياطي الجديد هيكون أكثر شفافية لإنه سهل تتبع عدد الوحدات بعكس احتياطي الذهب في فورت نوكس اللي محدش عارف تفاصيله.
فيه كمان ناس شايفة إن ترامب بيحاول يعزز الاهتمام بالعملات الرقمية لتحقيق مكاسب للمستثمرين خاصة بعد ما كسب 350 مليون دولار من إطلاق عملة رقمية باسمه ووردت تقارير عن إن عيلته ناقشت الاستثمار في منصة بينانس لكنه نفى الكلام ده.
مش بس أميركا اللي بتفكر في الفكرة البرازيل بتدرس إنشاء احتياطي مشابه وسويسرا استبعدت الموضوع السنة اللي فاتت ألمانيا باعت 50 ألف بيتكوين من العملات المصادرة أما السلفادور فاعتمدت البيتكوين كعملة رسمية لكنها تراجعت عن القرار بسبب قلة الإقبال الشعبي وبوتان عندها احتياطي بيتكوين بقيمة 900 مليون دولار اللي بيمثل 30% من ناتجها المحلي كل التطورات دي بتوضح إن العملات الرقمية بقت عنصر مهم في الاقتصاد العالمي والاحتياطي الأميركي الجديد ممكن يكون بداية لنموذج مالي جديد هيبان تأثيره خلال الشهور الجاية.
