رد قاطع من الحكومة على العودة لتطبيق خطة تخفيف الاحمال خلال فصل الصيف
خطة تخفيف الأحمال واحدة من الحاجات اللي شغالة بال ناس كتير جدا في الشارع المصري.. يا ترى الكهرباء هترجع تقطع تاني علي الناس في البيوت لو قطعت المدة هتكون اد اية.
قطع الكهرباء وتخفيف الأحمال واحدة من اهم المشاكل اللي واجهت الحكومة والناس علي مدار 2023 وفترة طويلة من 2024، واللي كانت واحدة من المشاكل اللي حلها كان صعب في وقتها خصوصا أن كلها كان بيتطلب توفير سيولة دولارية في البنوك، وللاسف دي مكنتش موجودة وبالتالي الأزمة طولت معانا لحد ما اتوجدت السيولة الدولارية وبالتالي الازمة اتحلت والأمور استقرت.
في الوقت الحالي في ناس كتير عندها تخوف من تكرار الأزمة في فصل الصيف اللي جاي خصوصا أن كل التوقعات بتقول أن فصل الصيف اللي جاي هيكون اكثر فصول السنة حرارة وده بسبب ان فصل الشتاء الحالي كان من اكثر الفصول سخونة علي الرغم من الكام يوم اللي كانت درجات البرودة مرتفعة فيهم شوية، ومن هنا الحكومة بدأت من دلوقتي تجهز وتأمن نفسها لفصل الصيف اللي جاي.
وعلشان الحكومة تبدأ تعد نفسها لفصل الصيف اللي جاي، بعد تجرب خطة الطؤاري اللي هيتم تنفذها في فصل الصيف خلال شهر رمضان اللي فات، والخطة اتنفذت بكل بنودها من تعامل الاطقم مع الأعطال وزيادة الاحمال علي الشبكة وتوفير المولدات الاماكن الضرورية والهامة في حالة انقطاع التيار، وده بهدف اختبار قوة الشبكة وقدرة الوزارة علي التعامل مع الموقف بشكل كامل.
طيب هل الدولة هترجع تطبيق خطة تخفيف الأحمال في فصل الصيف؟.
السؤال ده جاوب عليه وزير الكهرباء والطاقة المتجددة محمود عصمت واللي قال أن الوزارة ملتزمة بقرار مجلس الوزراء بعدم العودة لتطبيق خطة تخفيف الاحمال خصوصا بعد القدرات الكبيرة اللي الدولة اضافتها للشبكة واللي وصلت لـ2 جيجاوات من الطاقات الجديدة والمتجددة، واللي عملت انتعاش كامل للشبكة، ده غير ادخال نظام بطاريات التخزين لأول مرة علي الشبكة الموحدة للكهرباء واللي هتمكن الوزارة من تخزين الطاقة لاستخدامها في وقت الحاجة لها، ده غير المشروعات اللي الدولة شغالة عليها حاليا للربط الكهربائي مع دول الجوار واهمهم مشروع الربط الكهربائي المصري السعودي واللي هيكون بقدرة 3000 ميجاوات.
