قبل اجتماع الخميس المرتقب... تحرك عاجل من البنك المركزي!
إيه اللي بيحصل في الاقتصاد المصري الأيام دي؟ ؟.. ليه البنك المركزي قرر فجأة يسحب سيولة ضخمة من السوق؟ وإزاي ده ممكن يأثر على الأسعار والتضخم فى حياتنا اليومية؟ كل الأسئلة دي بتدور في دماغ الناس وواضح كده إن الأيام الجاية هتكون مليانة قرارات حاسمة
البنك المركزي المصري سحب الأسبوع ده 792 مليار جنيه من 26 بنك.. الرقم ده مش أول مرة يحصل الأسبوع اللي فات كمان سحب أكتر من 1.3 تريليون جنيه.. طيعا الأرقام ضخمة والقرارات أسرع من أي وقت فات.. وده بيحصل قبل اجتماع لجنة السياسة النقدية اللي كلنا مستنيينها يوم الخميس الجاي
طب إيه الهدف من كل ده؟
ببساطة البنك المركزي بيحاول يتحكم في السيولة الموجودة في السوق. لأن لما يكون فيه فلوس كتير متاحة، الناس بتصرف أكتر، والأسعار بتعلى، وده بيزود التضخم فالبنك هنا بيعمل عكس كده بيقلل الفلوس اللي بتجري في السوق علشان يهدّي ارتفاع الأسعار ويحافظ على استقرار الاقتصاد
لكن الغريب إن فيه خبر كويس وسط كل ده.. معدل التضخم الأساسي السنوي نزل من 25% في سبتمبر لـ24.4% في أكتوبر.. وده يعتبر مؤشر إن فيه تحسن طفيف في السيطرة على التضخم.. بس ده ما يمنعش إن البنك المركزي بيكمل في خطته بحذر علشان يضمن إن الأسعار فعلاً تهدأ على المدى الطويل
كمان البنك المركزي مش بس بيقلل السيولة لكنه غيّر أسلوب قبول العطاءات من البنوك… قبل كده كان بيقبل نسبة من العطاءات لكن دلوقتي بقى بيقبلها كلها بشرط إنها تتماشى مع سعر الفايدة اللي محدده وهو حاليًا 27.75% و الهدف من التغيير ده إن قرارات البنك توصل للسوق بشكل أسرع وأكتر فاعلية
طيب إزاي ده ممكن يأثر علينا؟
لما السيولة تقل في السوق البنوك بتضطر ترفع الفوايد على الودائع والشهادات علشان تجذب الفلوس من الناس..و ده معناه لو معاك فلوس حطيتها في البنك هتكسب فايدة أعلى لكن في نفس الوقت القروض والتمويلات هتكون أغل وده هيأثر على أي حد بيفكر ياخد قرض أو يفتح مشروع جديد
أما بالنسبة للأسعار، فالخطوات دي هدفها تهدئة التضخم تدريجيًا لكن لازم نكون واقعيين ممكن نحس بضغط على المدى القصير بسبب القرارات دي.. الأسعار مش هتقل في يوم وليلة لكن البنك المركزي واضح إنه بياخد خطوات جدية لتحقيق استقرار اقتصادي
اجتماع لجنة السياسة النقدية يوم الخميس هيكون محور اهتمام الجميع.. هل البنك المركزي هيقرر حفض سعر الفايدة ولا ممكن يرفعها أكتر؟ هل الإجراءات الأخيرة كفاية ولا محتاجين خطوات إضافية؟ الأسئلة دي كلها هنلاقي إجاباتها قريب جدا
في النهاية البنك المركزي بيتحرك بخطة واضحة ومحددة علشان يسيطر على التضخم ويحمي الاقتصاد.. و الأيام الجاية هتكون مليانة تحديات لكن القرارات دي هدفها ضمان استقرار أكبر في المستقبل
