معاك دولارات وعاوز تغيرها.. تروح البنك ولا شركة صرافة.. هنقولك الاختيار الأفضل
بتفكر تغيّر فلوس ومحتار بين البنك وشركات الصرافة؟ مش عارف اجابة السؤال اللي بيحير الكل مين فيهم بيديك السعر الأحسن؟ وهل فعلاً البنك أمان أكتر ولا الصرافة ممكن تكون أسرع وأوفر؟ لو حاسس إن الموضوع ده زي لغز محتاج تفك شفرته.
أول حاجة لازم نعرفها البنك والصرافة الاتنين بيغيروا العملة.. بس الطريقة والتكلفة هما اللي بيفرقوا.. البنك ما بيهزرش وبيحب ياخد حقه بالقانون.. يعني كل حاجة رسمية.. بتوثق العملية.. وبتاخد ورقة رسمية تثبت إنك غيرت فلوسك.. وده معناه إن لو بتغير مبلغ كبير أو عايز تعمل حوالة خارج مصر البنك ممكن يبقى اختيارك الأولاني.. بس فيه كام حاجة كده أسعار الصرف في البنك غالباً بتبقى أقل حاجات بسيطة جدا وكمان بياخدوا عمولة أو رسوم خدمة وده بيزود التكلفة.
على الناحية التانية شركات الصرافة بتمشي الموضوع بأخويا شوية.. هنا بتغير فلوسك في دقايق من غير ورق كتير ولا تعقيدات.. أسعار الصرف عندهم في أغلب الأحيان بتبقى أعلى بحاجات بسيطة من البنك وده لأنهم بيشتغلوا على العرض والطلب في السوق المفتوحة. يعني لو الدولار مثلاً مرتفع الصرافة ممكن تديك سعر أحسن بكتير من البنك. بس العيب؟ مش كل شركات الصرافة مضمونة، وممكن تلاقي ناس بتشتكي من شغل مش تمام أو نصب فلازم تختار مكان موثوق وله سمعة كويسة.. والهم انه يكون بسشتغل بتصريح من البنك المركزي عشان ما توديش نفسك فى داهية لأنك ممكن تلبش قضية تجارة عملة لو ما رحتش للصرافات المعتمدة من المركزي.
طب لو محتار أروح لمين فيهم البنك ولا شركة الصارفة؟
لو بتفكر في الأمان والاستقرار البنك هو لازم يكون اختيارك الأول لأنه بيحافظ على فلوسك تحت مظلة البنك المركزي وده بيديك طمأنينة لو العملية كبيرة أو رسمية.. لكن لو عايز توفر وقت وفلوس ومبلغك مش كبير أوي الصرافة ممكن تكون اختيار مناسب ليك.
و في 2025 .. وبعد ما السوق اتغير كتير بسبب التعويم وسياسات البنك المركزي، لسه فيه فرق ملحوظ بين الاتنين وما بقاش فيه أكتر من سعر للدولار والفريق بين البنك وشركات الصرافة بيكون قرش او قرشين فى سعر العملة فالأفضل تخليك فى الأمان وتلعب على المضمون وتروح البنك.
في الآخر القرار يرجعلك.. عايز أمان واستقرار ومش هاممك فرق السعر؟ البنك موجود. عايز توفر وتخلّص بسرعة؟ الصرافة في انتظارك.. المهم إنك تكون عارف احتياجك وتختار اللي يناسبك ولو لسه محتار اسأل نفسك: أنا مستعد أخاطر شوية عشان أوفر ولا الأمان أهم؟
