ميناء العين السخنة الكبير.. وحش مصر البحري في البحر الأحمر
هو إيه اللي بيحصل في ميناء السخنة الكبير في البحر الاحمر وازاي هيغير خريطة النقل البحري ويحول مصر لمركز إقليمي في التجارة العالمية وانتقال البضائع وتأثيره على قناة السويس.
الرئيس السيسي بدأ عهده في حكم مصر بتأسيس اقتصاد قوي وبدأ بالبنية التحتية الحديثة في كل القطاعات الاقتصادية وضربة البداية كانت بالطرق والمحاور والموانئ وخطوط التجارة وقناة السويس الجديدة والكهرباء والزراعة والاستثمار وعمل إنجازات غير مسبوقة في تاريخ مصر كله وصرف على البنية الأساسية بس اكتر من 10 تريليون جنيه وبسبب المشروعات دي اقتصاد مصر حقق اعلى معدلات نمو في العالم في وقت من الأوقات.
كلامنا النهاردة هيكون عن البنية الاساسية وتحديدا في قطاع الموانئ واللي اتحول لأهم قطاعات الاقتصاد في تاريخ مصر ودا بعد الطفرة والنقلة النوعية اللي حصلت فيه وبقت المواني المصرية من أحدث موانئ العالم حسب التصنيفات المتخصصة وهنتكلم النهاردة عن ميناء العين السخنة تحديدا ودا لأنه لوحده مشروع كان من الخيال واتحول لواقع وحقيقة وكفاية تعرف أنه هيكون أكبر واضخم مينا على البحر الأحمر كله وهيكون قبلة شركات النقل البحري في العالم ..
واللي بيحصل دلوقتي في ميناء السخنة إن فيه مشروع بيتنفذ لتطوير المينا باعتباره مشروع قومي هيعزز مكانة مصر كمركز عالمي للتجارة واللوجستيات ومشروع التطوير دا ضمن خطة الهيئة العامة للمنطقة الاقتصادية لقناة السويس لتحويل الميناء إلى أكبر ميناء محوري على البحر الأحمر بزيادة حركة التجارة الدولية وجذب المزيد من الاستثمارات الأجنبية في القطاع دا..
أعمال التطوير الفنية للميناء هتكلف حوالي 20 مليار جنيه وهتشمل توسعة الأرصفة و إنشاء أرصفة جديدة بطول 18 كيلومتر ليصل إجمالي طول الأرصفة إلى 23 كيلومتر وبعمق 18 متر ودا هيسمح باستقبال السفن العملاقة اي كان عمقها..وكمان توسيع ساحات التداول و زيادة المساحة الإجمالية لساحات التخزين إلى 8.6 مليون متر مربع لزيادة القدرة الاستيعابية للميناء وكمان المشروع بيشمل إنشاء مناطق لوجستية وتطوير مناطق بمساحة 6.3 كيلومتر مربع لتقديم خدمات التخزين والتوزيع الحديثة وجانب تنفيذ 33 كيلومتر من خطوط السكك الحديدية لربط الميناء بالقطار الكهربائي السريع وإنشاء شبكة طرق داخلية بطول 17 كيلومتر.
ميناء السخنة تابع للهيئة العامة للمنطقة الاقتصادية لقناة السويس واللي بتتولى الإشراف العام على الميناء بعد التطوير واللي بيقوم بأعمال التطوير مجموعة تحالفات دولية قوية واللي بيضم كبرى الشركات العالمية في مجال تشغيل المواني مكون من زي شركات هاتشيسون ودي شركة من هونج كونغ وبتعبر واحدة من كبرى شركات تشغيل الموانئ عالميا بجانب شركة فرنسية متخصصة في الشحن البحري وإدارة الموانئ وشركة COSCO الصينية ودي من أكبر مشغلي الموانئ في العالم وبتشارك في تشغيل محطات الحاويات داخل الميناء.
كمان مشروع تطوير الميناء بيشمل إنشاء منطقة خدمات لوجستية حديثة تمتد على مساحة 300 ألف متر مربع بدعم من مجموعة موانئ دبي العالمية (دي بي ورلد) باستثمارات تصل إلى 80 مليون دولار وتهدف إلى تعزيز القدرات التخزينية والتوزيعية للميناء وتحسين كفاءة عمليات النقل والتجارة بخلاف انشاء مخازن متطورة وساحات لوجستية مجهزة بأحدث التقنيات وكمان مستودعات جمركية لتسهيل عمليات التخليص الجمركي ودعم تجارة الترانزيت والصادرات المصرية من خلال حلول شحن وتخزين متكاملة وتقليل زمن الإفراج عن البضائع، مما يعزز من مكانة ميناء السخنة كمركز محوري لحركة التجارة الإقليمية والعالمية.
طبعا ميناء السخنة العالمي هيكون عامل جذب كبير لمرور مزيد من السفن في قناة السويس وانتعاش حركة التجارة الدولية وفي نفس الوقت قيمة مضافة للاقتصاد المصري.
