ليه مصر مهتمة بالاستثمار الأجنبي؟ والمليارات بتاعتوا بتروح فين؟

يا ترى ليه الحكومة مهتمة أوي كده بجذب استثمارات أجنبية مباشرة للسوق المصري؟ ومليارات الدولارات الل بيحققها بتروح فين بالظبط؟ وهل فيه أي خطورة من سيطرة شركات أجنبية على حصص الحكومة فى بعض الشركات ضمن برنامج الطروحات الحكومية؟

وفقا لآخر تقرير للبنك المركزي ارتفع صافي الاستثمار الأجنبي المباشر في القطاعات غير النفطية ليحقق صافي تدفقات بلغت نحو 23.9 مليار دولار خلال الفترة من يوليو 2023 الى  مارس  2024، مقارنة بحوالي 8.9 مليار دولار خلال الفترة نفسها من العام المالى اللى قبله

وطبعا السبب الرئيسي للارتفاع الكبير فى صافي استثمارات الأجانب فى مصر بيرجع بشكل أساسي الى صفقة رأس الحكمة اللى دخلت حوالى 35 مليار دولار 24 مليار دولار سيولة نقدية و11 مليار من الودايع الاماراتية فى البنك المركزي

وبمجرد الاعلان عن الصفقة دي قدرت مصر تنهي على أزمة نقص العملة الأجنبية اللى كانت بتعانى منها على مدار اخر 3 سنين وقدرت كمان تاخد قرار تاريخي بتحرير سعر صرف الجنيه مقابل العملات الأجنبية لأن البنك المركزي بقا عنده احتياطي قوى يقدر من خلاله يسيطر على سوق الصرف ويمنع اى مضاربات على العملة واختفت تماما السوق السودا للدولار وما بقاش فيه أكتر من سعر للعملات

وده يفسرلك اهمية الاستثمار الأجنبي المباشر وازاى انه بيدر عوائد وتدفقات دولارية بالمليارات ممكن تغير أوضاع الاقتصاد المصري وممكن تحل كتير من المشاكل اللى بنعانى منها وده يجاوب على سؤال ليه الحكومة مهتمة بالاستثمار الأجنبي المباشر وليه الدولة بتحاول تذلل اى عقبات قدام المستثمرين الأجانب وخد بالك ده مش فايدة للمستثمر لا ده فايدة للبلد لأن المستثمر ده هيوفر فرص عمل لالاف الشباب وهيصنع وينتج للسوق المحلى وبعد كده هيصدر والانتاج المحلى معناه تقليل الاعتماد على الاستيراد وتخفيف الضغط على فاتورة الوارادات والتصدير هيجيب عملة صعبة ويساهم فى حل أزمة نقص الدولار.

وفى السنين الأخيرة بيمثل الاستثمار الأجنبي المباشر في مصر نسبة منخفضة من الناتج المحلي الإجمالي، على الرغم من أن أهميته في تعويض النقص في المدخرات المحلية اللازمة لتمويل الاستثمارات، .. وبيعتبر الاستثمار الأجنبي المباشر من أهم أشكال التمويل الخارجي اللى بيرفع عن الموازنة العامة للدولة كتير من الضغوط وبيحل مشكلة الفجوة التمويلية اللى هى ناتج الفرق بين الايرادات والمصروفات

و أهمية الاستثمار الأجنبي المباشر مبقتش زي زمان مقصورة علي جذب رؤوس الأموال ونقل التقنيات الحديثة والمهارات الإدارية  ولكن دوره امتد كمان إلي المساهمة في تحسين الكفاءة الاقتصادية للدول من خلال زيادة درجة التنافسية ودعم القدرات التصديرية