امتي وليه.. لو قطاع خاص اعرف مرتبك الجديد كام ..ولو الشركة رفضت هنقولك تعمل إيه

 
الجمهورية الجديدة اللي الرئيس عبدالفتاح السيسي قايمة بشكل كامل علي النهوض بالمواطن المصري وبداية النهضة دي جاية من توفير لقمة عيش واجر عادل يضمن له حياة كريمة ومستوي معيشي متميز، وده اللي عملته الدولة بعد ما اقرت حزمة الرعايا الإجتماعية للعاملين بالجهاز الإداري للدولة.. وحاليا جه الدور علي القطاع الخاص.. يا تري الحد الأدني للأجور هيوصل لكام.. واية العقوبات اللي هتكون علي المنشأت والشركات الممتنعة عن تنفيذ القرار

الدولة المصرية في عز ازماتها الاقتصادية كان اول قراراتها الاعلان عن حزمة رعايا اجتماعية شملت العاملين بالجهاز الإداري للدولة ومستحقي المعاشات ومنح تكافل وكرامة واللي وصلت قيمتها لـ180 مليار جنية.. والقرار مكنش مفاجاة من الحكومة للمواطنين خصوصا ان الحكومة طول الوقت وهيا عنيها علي المواطن وشغاله علي راحته وقررت تاجيل زيادات في اسعار الخدمات زي الكهرباء واسعار تذاكر المواصلات زي المترو وقطارات السكك الحديدية مراعاة للظروف الإجتماعية.
الدولة شايفة إن مش كل المواطنين شغالين في الجهاز الإداري للدولة، وحاليا جه الدور علي القطاع الخاص، ووزارة التخطيط اعلنت ان الحكومة الزمت الشركات والمنشآت العاملة في القطاع الخاص بالعمل وفق الحد الأدني للأجور واللي هيوصل لـ 6000 جنيه كحد ادني للراتب الشهري لاي موظف او عامل ويرتفع وفقا للدرجة الوظيفية لكل موظف زيهم زي العاملين في الحكومة والجهاز الإداري للدولة .
طيب الزيادة الجديدة في اجور العاملين بالقطاع الخاص دي ترتيبها الكام في زيادات الاجور اللي حصلت قبل كده؟.
زيادة اجور العاملين بالجهاز الإداري بالدولة والموظفين في الفترات الأخيرة شهدت زيادة متتالية لحد ما وصل الحد الأدني ليها لـ6000 جنيه، وبالتالي القطاع الخاص ملزم هو كمان برفع الحد الأدني للاجور لنفس الراتب اللي اقرته الدولة.
الزيادة الجديدة في الأجور هتكون هيا الزيادة السادسة على التوالى، خصوصا أن الحد الأدنى للأجور سجل 1200 جنيها بس لحد مارس 2019، وبعدين جت توجيهات الرئيس بزيادة الأجور وارتفعت لـ 2000 جنيها بزيادة 66% تحملتها الموازنة العامة للدولة، وبعدين صدرت توجيهات رئاسية تانية بزيادة الأجور لمستويات 2400 جنيها في مارس 2021 ، وبعدين زادت تاني ووصلت لـ 2700 جنيها لأول مرة فى تاريخ مصر في يناير 2022، وقررت الدولة زيادتها تاني في مارس 2023 وارتفعت لـ 3500 جنيه، وفي الوقت ده صدر قرارا بزيادة المرتبات لـ 4 آلاف جنيه في سبتمبر 2023، واخيرا صدور حزمة قرارات الرعايا الإجتماعية اللي اقرها الرئيس في شهر فبراير2024  واللي وصلت نسبة الزيادة فيه لـ 50 % ووصل الحد الأدني للأجور لـ6000 جنيه .
طيب هل في عقوبات علي الشركات اللي هتمتنع عن تطبيق الحد الأدني للأجور ؟.

المجلس القومي للأجور، الزم جميع الشركات والمنشأت بلا استثناءات بتطبيق الحد الأدني للأجور، وان هيفتح حوار مع الشركات في الايام اللي جاية للتطبيق الفعلي للأجور، وأن الهدف من القرار هو الحفاظ على حقوق العمالة، واستقرار مواقع العمل والإنتاج، وأن الحكومة من مصلحتها تعزيز علاقات العمل بين كافة الأطراف.. طيب لو الشركة مزودتش مرتبك.. على طول من غير تفكير هتبلغ المجلس القومي للأجور ومكتب العمل وتثبت حالة.