صقور الأمن كلمة السر.. ليلة سقوط السوق السودا للدولار
يا ترى ايه سبب الارتباك واللخبطة اللي حاصلة في السوق السودا للدولار؟ وايه دور الأجهزة الأمنية في تراجع سعر دولار السوق الموازية؟ وازاي الضربات الأمنية اربكت تجار العملة والمضاربين؟
اللي حصل من تراجع وانهيار في السوق السودا للدولار خلال الأيام اللي فاتت مكنش هيحصل لولا تحرك ويقظة الأجهزة الأمنية وضرباتهم القوية لاباطرة العملة.
وفي الحقيقة لازم نشيد بجهود وتحركات وزارة الداخلية والمجهودات العظيمة والوطنية اللي قامت بيها في الفترة اللي فاتت.. ودة مش غريب على رجال الأمن المصريين.. الإشادة دي كان لازم نقولها لأنهم كانوا اللاعبين الأساسيين في تراجع الدولار في السوق السودا .. رجال وزارة الداخلية قاموا بمجهود خرافي جداً وبيشتغلوا ليل ونهار لضبط تجار العملة واللي كانوا عايزين يخربو اقتصاد البلد..
الأيام اللي فاتت نجح رجال وزارة الداخلية في ضبط عدد كبير منالمضاربين كانوا بيشتغلو في تجارة العملة والمضبوطات كانت كبيرة جدا.. وخلت اللي عايز يتاجر في العملة يعمل ألف حساب.
واحنا حابين هنا في بانكير نشكر رجال الأمن والأمان في مصر.. رجال وزارة الداخلية على مجهودهم الكبير.
وخلينا نقول لحضراتكم على شوية حاجات كدة عشان تعرفوا إزاي رجال الأمن كان ليهم تأثير في موضوع إنهيار الدولار في السوق السوداء
وزي ما احنا متابعين فى الأيام الأخيرة حصل ارتباك واضح فى السوق السودا للدولار والمضاربين وتجار العملة اختفوا تماما وتنفيذ عمليات البيع والشراء تراجع بشكل ملحوظ وحتى صفحات السوشيال ميديا اللى بتهتم بتداول العملات الجنبية الأدمن بتوعها اختفوا ومفيش تحديثات بتتم لأسعار العملات
وده لأن الأجهزة الرقابية والأمنية نشطة جدا فى الايام الأخيرة وبترصد وتتابع كل كبيرة وصغيرة بيتحصل فى سوق صرف العملات الأجنبية وبدأت تلاحق المضاربين وتجار العملة اللى بيضاربوا على الدولار واللى بيتلاعبوا بسعر العملة المريكية وخلوا سعرها يوصل الى حدود ٧٠ جنيه وده طبعا سعر مش عادل ولا حقيقي ولا بيعبر عن القيمة الحقيقية للجنيه المصري لكن طبعا تجار العملة كانوا بيستغلوا ازمة نقص الدولار وبيحاولوا يحققوا اكبر قدر من المكاسب
طب الأجهزة عملت ايه عشان تواجه ده ؟
فيه ترحكات بتتم فى اكتر من اتجاه اولا على صفحات التواصل الاجتماعي اللى بتنشر اخبار السوق السودا والتجار المنتشرين لشراء العملة الأجنبية ودول تم رصد عدد كبير منهم والأجهزة الأمنية ألقت القبض على مجموعة من تجار العملات والمتورطين فى تداول النقد الأجنبي خارج البنوك وتم ضبط كمية كبيرة من الدولارات مع المقبوض عليهم وفيه كمان تحرك بيتم على الأرض لرصد الحيتان الكبار والقبض عليهم وكلنا شفنا وتابعنا أخبار القبض على واحد من كبار حيتان الصاغة والدهب المتورط فى تجارة العملة وفى اشعال ازمة الدولار
ممكن حد يسأل ويقول والدولارات اللى بيتم ضبطها بتروح فين ؟
ده سؤال مهم جدا وعشان الناس تكون متطمنة.. فيه قانون بينظم عملية التعامل مع المضبوطات والأحراز فى قضايا العملة وغسيل الأموال وتجارة المخدرات والآثار وأى مبالغ بيتم ضبطها بيتم التعامل معاها وفقا للقانون ومن خلال محاضر الضبط الرسمية وفى حالة دولارات السوق السودا المبالغ المضبوطة بيتم تسليمها للجهات المعنية فى البنك المركزي وبتدخل فى الاحتياطي النقدي من العملات الأجنبية
وهل الملاحقات اللى بتتم ممكن تقضى على السوق السودا للدولار فى مصر؟
اللى بيحصل بين الحكومة والمضاربين وتجار العملة يشبه لعبة القط والفار وطول الوقت فى شد وجذب بين الطرفين الدولة بتحاول تسيطر وتقضى نهائيا على السوق السودا وتجار العملة وحيتان الدولار بيحاولوا يرجعوا ويمارسوا ألاعيبهم ويحققوا ثروات كبيرة لكن الدولة بتضرب بيد من حديد ومش هتسيب حد وكله هيتحاسب وقريب جدا هيتم الاعلان عن ضربات قوية جدا لتجار العملة الكبار
وهل كمية الدولار اللي تم ضبطها كبيرة ؟
بالفعل تم ضبط كميات كبيرة جدا من العملة الأجنبية ارقامها كافية لإغراق السوق بالملايين وطبعا ده كان هسخلى السوق السودا تولع من جديد لكن الأجهزة الأمنية كانت يقظة جدا وقدرت تظبط وتلقي القبض على عدد كبير من التجار وده خلا اى حد معاه عملة يخاف يبيعها خارج البنوك
