عودة الروح للجنيه المصري.. 3 حاجات هيقلبوا الموازين فى السوق السودا للدولار
فى الكام يوم اللى فاتوا حصلت كام حاجة مهمة هيكون ليهم تأثير قوي على عودة الروح للجنية المصري وهيعملوا قلبان فى السوق السودا للدولار وهيخلوا العملة الأمريكية سعرها يتراجع بقوة.. فيا ترى ايه اللى بيحصل فى الكواليس ؟ وازاى مصر عرفت توفر سيولة دولارية كبيرة الفترة الأخيرة؟ وهل كده أزمة نقص العملة فى طريقها للحل؟ وايه علاقة اللى بيحصل حاليا بالمفاوضات اللى بتعملها مصر مع صندوق النقد الدولي سواء بخصوص البرنامج اللى تم الاتفاق عليه فى ديسمبر أو محاولات اضافة برنامج تمويل جديد؟
فيه ارتفاع ملحوظ في السيولة الدولارية حصل فى الأيام الأخيرة داخل البنوك المصرية وحاليا اى حد سواء كان مسافر للخارج أو مستورد بيطلب دولار بياخد الكمية اللى محتاجها ومعظم البنوك بتوفر أي مبالغ مطلوبة بالعملة الصعبة وتم إلغاء الحجز المسبق لسحب أي مبالغ أكتر من 10 آلاف سواء بالنسبة للدولار أو العملات الأجنبية التانية وزادت كمان الموافقات الخاصة بالإفراجات الجمركية للمستودين بنسبة تتخطى الـ 30%.
وده معناه ان بقا فيه وفرة كبيرة جدا فى النقد الأجنبي داخل البنوك بشكل يخليها توفى باحتياجات المستوردين والشركات وده وضح جدا فى حجم الافراج عن البضايع من الموانيء المصرية وبلغت قيمة البضائع المُفرج عنها خلال الفترة من 1 يناير 2023 وحتى 30 سبتمبر 2023 حوالى 53.7 مليار دولار
وخد بالك دي أرقام كبيرة جدا خصوصا فى ظل أزمة شح العملة اللى مصر بتعانى منها فى الفترة الأخيرة مع أزمة اقتصادية عالمية بتشتكى منها حتى دول العالم المتقدم.
وفيه كمان زيادة كبيرة فى الإيداعات الدولارية الخاصة بالعملاء سواء لشراء شهادات أو لإيداعها في الحسابات الخاصة
مش بس كده فيه خبر مهم جدا مر مرور الكرام ومحدش ركز معاه ولا خد باله منه رغم أهميته وتأثيره الايجابي على سوق الصرف فى مصر.. وده بعد ما أعلن أعلن البنك المركزى عن ارتفاع رصيد احتياطى النقدى الأجنبى خلال شهر أكتوبر ليسجل 35.108 مليار دولار، مقابل 34.970 مليار دولار بنهاية سبتمبر بارتفاع بقيمة 131 مليون دولار
وبتتكون العملات الأجنبية بالاحتياطى الأجنبى لمصر من سلة من العملات الدولية الرئيسية، هى الدولار الأمريكى والعملة الأوروبية الموحدة «اليورو»، والجنيه الإسترلينى والين اليابانى واليوان الصينى ودي نسبة بتوزع حيازات مصر منها على أساس أسعار صرف العملات دي ومدى استقرارها فى الأسواق الدولية، وبتتغير حسب خطة موضوعة من قبل مسؤولى البنك المركزى المصرى.
وارتفع رصيد احتياطى النقدى الأجنبى لدى البنك المركزى خلال شهر سبتمبر ليسجل 34.970 مليار دولار مقابل 34.928 مليار دولار بنهاية أغسطس.
وزي ما كلنا عارفين الوظيفة الرئيسية للاحتياطى من النقد الأجنبى لدى البنك المركزى، بمكوناته من الدهب والعملات الدولية المختلفة هى توفير السلع الأساسية وسداد أقساط وفوائد الديون الخارجية ومواجهة الأزمات الاقتصادية فى الظروف الاستثنائية مع تأثر الموارد من القطاعات المدرة للعملة الصعبة.
ومن الأخبار المهمة والخاصة بتوفير سيولة دولارية تصريحات قالها وزير المالية محمد معيط أكد فيها إنه من المتوقع أن تصل قيمة تدفقات الاستثمارات الأجنبية خلال العام المالي المقبل إلى 12 مليار دولار مقابل 10 مليارات دولار خلال العام المالي اللى فات.
كمان قناة السويس سجلت إيرادات بقيمة 10 مليارات دولار السنة اللى فات ومن المستهدف انها تزيد إلى 12 مليار السنة دي.
وطبعا زيادة الحصيلة الدولارية واى اخبار ايجابية عن نجاح البنك المركزي والحكومة فى توفير عملة صعبة بيكون ليه تاثير ايجابي كبير على السوق السودا وزي ما احنا عارفين سعر الدولار بينخفض كل ما كان فيه أخبار ايجابية عن توفير العملة الأمركية والعكس صحيح.
