قليلة الأشواك ومطلوبة عالميًا.. لماذا تراهن مصر على أسماك الباسا؟

مصر عندها فرصة تدخل نوع جديد بقوة في الاستزراع السمكي.. سمكة الباسا، اللي بتتميز إنها قليلة الأشواك ومطلوبة في أسواق كتير حول العالم.

الباسا، أو "القرموط الفيتنامي"، من أسماك المياه العذبة، وبتتميز بلحم أبيض طري وطعم معتدل، وكمان عدد أشواكها قليل نسبيًا، وده بيخليها مناسبة جدًا للتصنيع في صورة فيليه مجمد، والمطاعم وسلاسل التجزئة.

والميزة الأكبر إن الباسا سريعة النمو؛ فترة استزراعها بتتراوح بين 6 و8 شهور، وبتوصل السمكة خلالها لوزن من حوالي كيلو لـ1.3 كيلو.

كمان بتتحمل درجات من الملوحة وانخفاض الأكسجين وجودة المياه، واحتياجاتها من البروتين في العلف حوالي 25%، وده ممكن يخلي إنتاجها اقتصادي مقارنة ببعض الأنواع الأخرى.

وعشان كده، التوسع في إنتاج الباسا ممكن يفتح لمصر باب جديد في تصدير الأسماك البيضاء والفيليه، بدل الاعتماد على عدد محدود من الأنواع التقليدية.

وده جاي في وقت إنتاج مصر من الأسماك تجاوز مليوني طن سنويًا، والاستزراع السمكي بيمثل حوالي 78% من إجمالي الإنتاج.

لكن التوسع في الباسا مش من غير تحديات، خصوصًا إن الإنتاج التجاري منها في مصر لسه محدود، وسبق إن دراسات أشارت لتحديات مرتبطة بالتسويق ودرجات الحرارة في الشتاء وتوفير الأعلاف المتخصصة.

يعني الباسا ممكن تكون ورقة جديدة لمصر في سوق الأسماك العالمي.. لكن نجاحها هيعتمد على التوسع المدروس، والتجهيز والتعبئة والتجميد، والوصول لأسواق التصدير.