تقلبات مفاجئة في سوق العملة.. إيه اللي بيحصل للدولار؟

الدولار بدأ يتراجع من جديد في مصر.. لكن السؤال الأهم .. هل التراجع ده مجرد حركة مؤقتة؟ ولا السوق داخل على مرحلة جديدة؟ وإيه اللي حصل للدولار وخلاه ينزل تاني تحت مستوى الـ52 جنيه؟ وليه الأموال الساخنة بدأت تخرج من أدوات الدين المصرية بمئات الملايين من الدولارات؟ وهل التقلبات دي ممكن يكون ليها تأثير على حركة سعر الدولار خلال الفترة الجاية؟

خلينا نجاوب على الأسئلة دي واحدة واحدة.. الدولار واصل تراجعه خلال تعاملات النهارده، بعد ما بدأ سلسلة التراجعات من تعاملات امبارح، وده بعد ما العملة الأمريكية كانت وصلت لمستوى 52 جنيه الأسبوع اللي فات لأول مرة من حوالي 3 شهور.

وبحسب الأسعار المعلنة، أعلى سعر للدولار وصل لـ51.89 جنيه للشراء و51.99 جنيه للبيع في بنوك أبوظبي الإسلامي والكويت الوطني والأهلي الكويتي وقناة السويس.

وفي المقابل، أقل سعر كان في بنك أبوظبي التجاري عند 50.82 جنيه للشراء و50.92 جنيه للبيع.

أما البنك المركزي المصري فسجل الدولار 51.86 جنيه للشراء و52 جنيه للبيع.

طيب إيه حكاية الأموال الساخنة؟

الأموال الساخنة شهدت خلال الأيام الأخيرة تحركات متقلبة في السوق الثانوية لأدوات الدين الحكومي المصري… وبحسب بيانات البورصة المصرية، سجلت تعاملات العرب والأجانب صافي بيع بحوالي 513 مليون دولار خلال تعاملات الأسبوع الماضي.. وده معناه إن المستثمرين الأجانب والعرب باعوا من استثماراتهم في أدوات الدين المصرية بقيمة أكبر من مشترياتهم خلال الأسبوع

و ليه الأموال الساخنة بتتحرك بالشكل ده؟

البيانات بتوضح إن حركة الأموال الساخنة شهدت تقلبات واضحة خلال الأيام الأخيرة، بالتزامن مع عودة التوترات الجيوسياسية في المنطقة.

وبالتالي، السوق شهد في أيام دخول سيولة كبيرة، وفي أيام تانية خروج بمئات الملايين من الدولارات.

المشهد الحالي بيجمع بين عاملين مهمين..  الدولار بدأ يتراجع من جديد بعد ما تجاوز مستوى الـ52 جنيه الأسبوع الماضي، وفي نفس الوقت حركة الأموال الساخنة بتشهد تقلبات واضحة بين الشراء والبيع.