من البحر الأحمر للمتوسط.. مصر تبدأ عصر النقل فائق السرعة

مصر داخلة على مرحلة جديدة في النقل.. من العين السخنة على البحر الأحمر لحد العلمين ومرسى مطروح على البحر المتوسط، أولى قطاعات الخط الأول من شبكة القطار الكهربائي السريع تستعد لبدء التشغيل التجريبي أوائل أكتوبر المقبل، وده هيكون من غير ركاب في البداية.

الخط ده طوله 660 كيلومتر، وبيضم 21 محطة، ومش معمول لنقل الركاب بس..
المنظومة هتضم 15 قطارًا سريعًا و34 قطارًا إقليميًا، بالإضافة لـ 14 جرارًا لنقل البضائع.

يعني نفس الشبكة هتربط بين المدن، والموانئ، والمناطق الصناعية واللوجستية، وكمان المناطق السياحية الموجودة على مسار الخط.

والحكاية أكبر من خط واحد..
شبكة القطار الكهربائي السريع المستهدفة هتوصل لحوالي 2250 كيلومتر، من خلال 4 خطوط و60 محطة.

الخط الثاني هيمتد من أكتوبر لأبو سمبل مرورًا بمدن الصعيد، والخط الثالث هيربط قنا بسفاجا والغردقة، بينما الخط الرابع المخطط له هيربط بورسعيد بالإسكندرية.

ومع اكتمال الشبكة، هيكون فيها 41 قطارًا سريعًا و94 قطارًا إقليميًا، بالإضافة لـ41 جرارًا لنقل البضائع.

والتشغيل الرسمي للركاب هيبدأ بعد استكمال التجهيزات الفنية والأمنية، وأعمال الأسوار والكباري والتقاطعات.

يعني القطار السريع هنا مش مجرد وسيلة مواصلات جديدة..
دي شبكة بتربط البحر بالموانئ، والموانئ بالصناعة، والمدن بالسياحة واللوجستيات في مسار واحد.