الاتحاد الأوروبي يفتح خزائنه لمصر.. دعم بـ 4 مليار يورو في توقيت صعب
يا ترى إيه حكاية الـ 4 مليار يورو اللي قدمهم الاتحاد الأوروبي لمصر؟ وليه الأوروبيين بيصروا يدعموا مصر بالمبالغ الضخمة دي؟ والفلوس دي كلها هتروح فين؟
في البداية كده لازم نفهم ان الـ 4 مليار يورو دول مش جايين لوحدهم .. دول جزء من حزمة أكبر بـ 7.4 مليار يورو الاتحاد الأوروبي تعهد بيها لمصر من مارس 2024 .. يعني لو حولنا الرقم ده لدولار هيبقى حوالي 8 مليار دولار .. ولو حولناه لجنيه مصري بالسعر دلوقتي يوم 2 أبريل 2025 هيطلع حوالي 400 مليار جنيه مصري .. أيوه زي ما سمعتوا.. 400 مليار جنيه.
طب الفلوس دي جاية ليه وهتروح فين؟ الحكاية ببساطة إن مصر بتمر بظروف اقتصادية صعبة .. أزمة الدولار والتضخم وارتفاع الأسعار مشكلة كل بيت مصري عايشها .. والحزمة دي جاية عشان تساعد مصر تتخطى التحديات دي.
خلينا نكسر الحتة دي شوية .. الـ 4 مليار يورو اللي أقرهم البرلمان الأوروبي دول الشريحة التانية من الدعم .. الشريحة الأولى كانت مليار يورو واتصرفوا فعلاً في ديسمبر 2024 .. والباقي هيتصرف على 3 سنين لحد 2027 .. يعني إحنا بنتكلم عن خطة طويلة الأجل.
طب الفلوس دي هتعمل إيه؟
ببساطة هتدعم الموازنة العامة للدولة .. يعني هتساعد الحكومة تدفع مرتبات وتغطي احتياجاتها التمويلية .. وكمان هتساهم في استقرار الاقتصاد الكلي .. يعني تخفف الضغط على الجنيه وتساعد في توفير الدولار اللي احنا محتاجينه زي الهوا.
لكن السؤال الكبير اللي في دماغكم دلوقتي .. ليه الاتحاد الأوروبي بيعمل كده؟ .. هو بيحبنا قوي كده ولا إيه؟
الحقيقة إن الدعم ده مش حب في مصر وخلاص .. ده استثمار استراتيجي .. مصر بالنسبة لأوروبا زي خط الدفاع الأول .. تخيلوا مصر دولة فيها 105 مليون مواطن .. وفوقيهم 9 مليون لاجئ من السودان وسوريا وغيرهم.
طب لو مصر وقعت اقتصادياً هيحصل إيه؟ هيبقى فيه هجرة غير شرعية كبيرة لأوروبا .. والأوروبيين عارفين كده كويس .. عشان كده بيدعموا مصر عشان تبقى قوية ومستقرة .. لأن استقرار مصر يعني استقرار المنطقة كلها.
ونيجي لنقطة تانية مهمة .. مصر مش بس حاجز ضد الهجرة .. مصر كمان شريك اقتصادي كبير .. بصوا على التعاون اللي بينا وبين الاتحاد الأوروبي .. فيه استثمارات في الطاقة النظيفة زي الهيدروجين الأخضر .. وفيه مشروعات زي كابل الألياف الضوئية البحري اللي بيربط شمال إفريقيا بأوروبا .. ده غير دعم الأمن الغذائي زي تخزين الحبوب .. يعني الفلوس دي مش بس بتساعد مصر .. دي كمان بترجع للأوروبيين في صورة مشروعات واستقرار.
طب خلينا نركز على أهمية الحزمة دي لينا احنا المصريين .. الـ 4 مليار يورو دول هيساعدوا الحكومة تكمل إصلاحاتها الاقتصادية .. زي إيه؟ .. زي مرونة سعر الصرف وتحسين بيئة الاستثمار .. وده هيخلّي الاقتصاد يتنفس شوية .. كمان جزء من الفلوس هيروح لدعم اللاجئين اللي عايشين في مصر .. ودي حاجة كبيرة لأن مصر بتحمل عبء ضخم في الملف ده .. يعني احنا مش بس بنساعد نفسنا .. احنا بنساعد المنطقة كلها.
ولو بصينا على الصورة الكبيرة .. الدعم ده بيأكد إن مصر لسه ليها وزنها الإقليمي .. الاتحاد الأوروبي مش بيدي فلوس لحد كده على الفاضي .. ده بيثبت إن مصر شريك استراتيجي مش ممكن يتجاهلوه .. وده اللي قالته رئيسة البرلمان الأوروبي روبرتا ميتسولا لما وصفت الدعم ده بانه 'استثمار في الإصلاحات مع شركائنا الاستراتيجيين.
