إمتي الحكومة هتعلن عن زيادة اسعار البنزين والسولار في مصر؟
الشارع المصري كله حاليا مشغول بالزيادات الجديدة اللي هتحصل في اسعار البنزين والسولار.. ياتري امتي الحكومة هتقر الزيادات دي وهل هتوصل لارقام كبيرة.
الفترة اللي جاية هتشهد قرارات هتهم الشارع المصري كله بكل طؤافه، واول القرارات اللي هتهم كل مواطن مصري هيكون قرارات لجنة تسعير المواد البترولية واللي هتعقد أول اجتماع لها في 2025 وده بعد 6 شهور كاملة من توقف عملها واللي كان بناء علي قرار من القيادة السياسية لما وجه الحكومة بتأجيل اقرار اي زيادات في الأسعار سواء كانت زيادات في اسعار البزين والسولار أو شرائح الكهرباء مراعاة للبعد الأجتماعي وبسبب الظروف الاقتصادية الصعبة اللي كان بيمر بيها المواطن المصري.
طيب امتي لجنة تسعير المواد البترولية هتعقد اجتماعها اللي جاي؟.
لجنة تسعير المواد البترولية هتعقد اجتماعها الجديد في شهر ابريل اللي جاي، والقرار اللي هيخرج عنها هيكون زيادة اسعار المواد البترولية خصوصا أن الحكومة أعلنت عن رفع الدعم بشكل كامل عن المحروقات والمواد البترولية بنهاية 2025، وبالتالي القرار اللي هيخرج عن اللجنة هيكون بالتاكيد زيادة اسعار البنزين والسولار وانبوبة البوتاجاز والزيادة هتكون بارقام كبيرة نسبنا عن الزيادات اللي اقرتها اللجنة في السنين اللي فاتت.
الزيادة الجديدة لاسعار البنزين والسولار في مصر هيكون السبب فيها البنود اللي اتفقت عليها مصر مع صندوق النقد الدولي واللي بناء عليها وافق الصندوق علي منح مصر قرض بقيمة 8 مليار دولار في شهر مارس 2024 واللي مصر صرفت منه 4 شرائح حتي الان وكان اخرهم الشريحة اللي وافق البنك علي صرفها لمصر بقيمة 1.2 مليار دولار.
البنود اللي الحكومة وافقت عليها مع صندوق النقد الدولي اغلبها متعلق برفع الدعم، أول بنود رفع الدعم كانت رفع الدعم عن المحروقات بشكل عام والوصول لزيرو دعم للبنزين والسولار بنهاية 2025 واللي الحكومة برئاسة الدكتور مصطفي مدبولي رئيس مجلس الوزراء اعلنت عن عزمها تطبيقه في الفترة اللي جاية، علشان مصر تقدر تصرف باقي شرائح قرض الـ8 مليار وميحصلش تاخير تاني في صرف الشرائح زي ما حصل في الشريحة الرابعة الاخيرة.
