إيه أنواع الحسابات في بنوك مصر؟.. وإيه الفرق بين الحساب الجاري والتوفير؟ (فيديو)
قاعد تفكر ومش عارف ليه فلوسك مش بتزيد؟ طب إيه رأيك لو قولتلك إن في حساب بنكي ممكن يخليك تستخدم فلوسك زي ما إنت عايز، بس من غير ما تكسب منه ولا مليم؟ وفي حساب تاني يزود فلوسك كل شهر من غير ما تلمسها؟ فى الفيديو ده هنقولك إنت الفرق بين الحساب الجاري والتوفير؟ وايه أنواع الحسابات اللى بتقدمها البنوك فى مصر؟ والفرق بين كل نوع والتاني؟
البنوك المصرية بتقدم أنواع مختلفة من الحسابات وأولها الحساب الجاري.. وده بيطلقوا عليه 'الجندي المجهول' في حياتك اليومية.. بتفتحه عشان تسحب فلوس.. تحول لحد.. تدفع فاتورة الكهربا.. أو حتى تشتري حاجة أونلاين. يعني ده حسابك اللي بتحتاجه في كل حتة وبيديك حرية كاملة تتحكم في فلوسك من غير تعقيد.. بس عيبه الفايدة عليه غالبًا صفر.. ولو فيه عائد بيبقى ضعيف جدًا فمتستناش إنه هيزود مدخراتك.
نيجي بقى لحساب التوفير.. وده 'الصندوق السحري' بتاعك.. بتحط فيه فلوسك وتسيبه.. والبنك بيديك فايدة عليه كل شهر أو كل سنة حسب شروطهم.. يعني لو عايز توفر عشان تجيب موبايل جديد أو تجهز شقة.. الحساب ده هيساعدك تخطط صح.. بس لازم تعرف إنك مش هتقدر تسحب منه زي الجاري.. لأنه بيحتاج يفضل فيه مبلغ معين عشان الفايدة تتضاف.. في 2025 البنوك زي البنك الأهلي بتقدم فايدة تصل لـ 5% على التوفير حسب الحد الأدنى.
طب إيه الفرق الكبير بين الحساب الجاري والتوفير؟
الحساب الجاري مرن .. بيخليك تتصرف في فلوسك 24 ساعة.. وممكن تطلع بطاقة فيزا أو تفتح حساب أونلاين في دقايق.. أما التوفير فهو بيحافظ على فلوسك ويكبرها.. بس بقيود على السحب.. يعني لو إنت من اللي بيحبوا يصرفوا كل يوم الحساب الجاري أفضلك.. أما لو بتحلم بمستقبل أحسن التوفير هو طريقك.
ونروح بقى لأنواع الحسابات اللي موجودة في البنوك المصرية. غير الجاري والتوفير.. فيه الوديعة لأجل.. ودي بتحط فيها فلوسك لمدة معينة – من شهر لـ 7 سنين – وبتاخد فايدة عالية بس مش هتقدر تسحبها قبل ما تخلّص.
كمان فيه حسابات الشباب اللي بتبدأ من 100 جنيه في بنك مصر.. وحسابات الأطفال اللي بيفتحها الأهل عشان يأمنوا مستقبل العيال.. ولو بتحب الفايدة السريعة فيه حسابات زي 'الميجا توفير' من بنك القاهرة بتديك عائد يومي يتحسب على رصيدك.
