ايه اللي هيحصل في الأسواق بعد مفاجأة الفيدرالي؟
إيه اللي ممكن يحصل في الأسواق العالمية بعد ما الفيدرالي قرر الابقاء على أسعار الفائدة زي ما هي .. هل الدولار هيتربع على عرش العملات ولا هيتراجع .. والدهب هيطلع للسما ويبقى الملاذ الآمن بتاع الكل.. ولا هيهدى وينام.. والنفط والسلع التانية زي القمح والحديد.. هيترفعوا ولا هيقعوا في الأرض؟
الفيدرالي الأمريكي قرر من ساعات قليلة انه يسيب أسعار الفايدة على حالها عند 4.25% - 4.5%.. يعني مفيش رفع ولا خفض.. و دي المرة التانية في 2025 اللي الفيدرالي يقول فيها ‘كده كويس’ بعد ما خفض الفايدة 3 مرات السنة اللي فاتت في سبتمبر ونوفمبر وديسمبر.. بإجمالي نقطة كاملة.. ليه.. عشان يدي التضخم فرصة يهدى ويقرب من هدفهم الـ2%.. من غير ما يضربوا الاقتصاد في مقتل.. وفي نفس الوقت يشوفوا سياسات ترمب الجديدة – زي الرسوم الجمركية – هتعمل إيه في السوق.
طب إيه اللي بيحصل دلوقتي؟
الفيدرالي بيقول إن الاقتصاد الأمريكي لسه قوي.. والبطالة مستقرة عند مستوى منخفض.. وسوق العمل كويس.. بس التضخم لسه مرتفع شوية.. يعني هما حابين ياخدوا نفس ويفهموا الصورة أكتر.. خصوصاً مع الحرب التجارية اللي ترمب شغال فيها.. واللي خلت ثقة المستهلكين في أمريكا تهبط لأقل مستوى من سنتين.. وتوقعات التضخم ترتفع بقوة.. فالتثبيت ده بيديهم مساحة يدرسوا تأثير الرسوم دي قبل ما يتحركوا تاني.
نيجي للدولار الأول.. العملة اللي بتحرك السوق كله.. لما الفايدة تتثبت.. الدولار بيبقى زي اللاعب اللي واقف في الملعب مش عارف يجري يمين ولا شمال.. مش هيطلع زي الصاروخ لو الفايدة اترفعت.. ولا هينزل في الداون لو اتخفضت.. بس مع الرسوم الجمركية الجديدة بتاعة ترمب.. لو الناس حسوا إن الاقتصاد الأمريكي هيضعف.. الدولار ممكن يتراجع حبة.. لكن لو السوق شاف إن التثبيت ده معناه استقرار.. ممكن يفضل ثابت أو يقوى شوية.. يعني كله بيعتمد على ثقة المستثمرين.
نيجي للدهب اللى بيحب الفايدة الثابتة أو المنخفضة.. لأنه بيبقى الخيار المفضل بتاع اللي خايفين من التضخم.. لما الفيدرالي يقول ‘مش هنخفض ولا نرفع’.. الدهب ممكن يرتفع حبة.. خصوصاً إن توقعات التضخم في أمريكا زادت بسبب الرسوم الجمركية.. الناس بتبص للدهب دلوقتي عشان تحمي فلوسها.. بس لو حسوا إن التضخم هيهدى فعلاً.. ممكن الدهب ما يتحركش كتير ويفضل في حتة وسط.
نيجي للنفط أو الدهب الأسود اللي الكل بيترقبه.. النفط بيتأثر بالدولار وبحركة الاقتصاد العالمي.. لو الدولار ضعف حبة بسبب التثبيت.. النفط ممكن يرتفع لأنه بيبقى أرخص للمشترين من بره أمريكا.. يعني لو أنت في الصين أو أوروبا.. هتحس إن البرميل سعره ألطف.. لكن لو الطلب العالمي على النفط مش قوي – وده ممكن يحصل لو الاقتصاد الأمريكي بطّل بسبب الحرب التجارية – يبقى النفط هيفضل نايم أو يتراجع شوية.
وبالنسبة للسلع الاستراتيجية التانية زي القمح والنحاس والحديد.. دول كمان بيتأثروا بللدولار.. لو الدولار هبط.. أسعارهم ممكن ترتفع لأنهم بيبقوا أرخص للمستوردين.. لكن التثبيت ده بيدي إشارة إن الاقتصاد العالمي مش هيتحرك بسرعة لفوق أو لتحت.. يعني السلع دي غالباً هتفضل في حالة ‘أنا كده تمام’.. تذبذب خفيف من غير طفرات كبيرة.
نروح بقى للأسهم.. اللي بتحب الفايدة الثابتة عشان الشركات بتقدر تقترض بسهولة.. لكن الوضع دلوقتي مش مثالي.. الأسهم في أمريكا زي الداو جونز وإس آند بي 500 شافت هبوط حاد الأسابيع اللي فاتت بسبب الرسوم الجمركية وتراجع ثقة المستهلكين.. فالتثبيت ممكن يهدي السوق حبة ويدي الأسهم فرصة ترتفع شوية.. لكن لو كلام جيروم باول – رئيس الفيدرالي – في المؤتمر الصحفي حسس الناس إن في مشاكل جاية.. ممكن الأسهم تخاف وتهبط تاني.
جيروم باول قال قبل كده إنهم مش مستعجلين على خفض الفايدة.. وإن الاقتصاد لسه ‘في وضع جيد’.. يعني هو شايف إن مفيش داعي للذعر.. بس في نفس الوقت عينه على تأثير سياسات ترمب.. الرسوم الجمركية دي زي القنبلة الموقوتة.. لو ضغطت على الاقتصاد أكتر.. التضخم ممكن يزيد.. والفيدرالي وقتها يضطر يغير خطته.
