تطور سريع في ملف الغاز الطبيعي.. مصر تستعد للتصدير
ايه اللي بيحصل في دمياط وإدكو.. وايه التحضيرات اللي بيتم هناك دلوقتى وليه الموضوع فيه مفاجأة من العيار التقيل.
مصر بتحضر لتصدير أول دفعة من الغاز الطبيعي.. ايوا حضرتك سمعت صح ودا اللي كشفته وكالة بلومبرج في الساعات الأخيرة وقالت إن مصر بتستعد لاستئناف التصدير وقالت ان تدفقات الغاز رجعت إلى محطات دمياط وإدكو.. ودا معناه إن مصر بتستعد لتصدير أول شحنة غاز طبيعي مسال من إدكو .. وقالت التفاصيل أن معاد عودة التصدير لسه مش معروف بالتحديد لكن بتقول إن مصر بدأت تعود للمنافسة في أسواق الغاز العالمية لكن التصدير هيعتمد على توافر إمدادات كافي.
رغم مفيش معلومات كتيرة عن استعدادات مصر لاستئناف تصدير الغاز لكن الخبر نفسه مهم جدا وبيشير لتطور سريع في ملف الغاز المصري وازاي الدولة قدرت تحول العجز الكبير في الإنتاج والاستهلاك في الصيف اللي فات الي كلام عن التصدير والفائض.. طيب مصر عملت كده ازاي؟.. لو حضرتك تابعت جهود الدولة في ملف الغاز والبترول تحديدا في الشهور اللي فاتت كنت هتعرف إزاي الحكومة سابقت الزمن عشان تعالج الخلل بين الإنتاج والاستهلاك في قطاع الطاقة بشكل عام وفي ملف الغاز تحديدا لانه بيستخدم بكميات كبيرة في تشغيل محطات انتاج الكهرباء ومصر اضطرت تستورد كميات ضخمة من الغاز في الصيف اللي فات عشان تلبي احتياجات محطات الكهرباء والاستهلاك المحلي الزائد.
وفي نفس الوقت الحكومة مستنتش أزمة صيف 2024 تتكرر تاني وقررت استغلال الأسعار التنافسية في اسواق الغاز الدولية واشترت كميات وشحنات كبيرة لتخزين احتياطي كبير من الغاز وفي نفس الوقت بدأت عملية تنقيب واسعة في أنحاء الجمهورية على البترول والغاز وتنمية الحقول القديمة بعد سداد ديون الشركات العالمية المتخصصة في مصر واللي بدأت تضخ استثمارات جديدة للتنقيب وتنمية الحقول وشفنا حجم الاكتشافات الكبيرة اللي حصلت في اكتر من منطقة واللي بتستعد دلوقتي للدخول في خريطة الإنتاج وكمان رجعت عمليات التنمية لحقل ظهر من تاني عشان يرجع لمعدلات الإنتاج الطبيعية بتاعته وكمان بيتم حفر آبار غاز جديدة في نفس منطقة امتياز ظهر لمضاعفة الإنتاج ودا كله بيقول إن مصر رجعت بقوة في ملف الطاقة وقريب هتستأنف التصدير.
طبعا معني إن مصر ترجع تصدر غاز تاني أنها خلاص عبرت أزمة نقص الوقود مع زيادة عمليات الاستكشاف وكمان معناها توفير مليارات الدولارات كانت بتروح في الاستيراد يعني هتوفر من كل ناحية وقطاع الطاقة كمان هيجذب مزيد من الاستثمارات الجديدة مع زيادة عمليات الاستكشاف والتنقيب وبكده تكون الحكومة قلبت المحنة لمنحة في ظرف شهور قليلة.
