مفاجآت جديدة في صفقة بنك القاهرة.. شوف التقرير ده
ايه كواليس صفقة بنك القاهرة ومين من مصلحته نشر الإشاعات والأخبار الكاذبة عن بيع البنك... وايه التفاصيل الجديدة اللي عرفها بانكير عن عمليات التفاوض للاستحواذ على البنك.
قلنا هنا قبل كده في بانكير إن فيه شاىعات كتير انتشرت حولين بيع بنك القاهرة وادعت المعلومات اللي انتشرت على منصات بعينها على السوشيال ميديا إن الصفقة تمت في نص الليل ومن غير ما حد يعرف ودا كلام طبعا من خيال المنصات دي لأن مفيش صفقات يتم من تحت الترابيزة وكل تفصيلة في الملف الاقتصادي وفي ملف الطروحات الحكومية بيتم نشرها بالتفصيل وفي مؤتمر صحفي لكن يظهر كده إن فيه جهات بتحرض لهدف معين لضرب العلاقة بين مصر والإمارات تحديدا بعد الكلام إن بنك الإمارات دبي الوطني استحوذ على البنك بسعر أقل بكتير من سعره العادل ودا اللي تم نشره على صفحات عبر وسائل التواصل الاجتماعي لإثارة الغضب والفتنة بين المواطنين.
المعلومات الجديدة اللي حصلنا عليها من مصادر مصرفية موثوق فيها حولين تفاصيل صفقة الاستحواذ على بنك القاهرة بعد موافقة البنك المركزي المصري كشفت حقيقة القيمة المتداولة عبر وسائل التواصل كشفت المصادر إن صفقة الاستحواذ على بنك القاهرة المرتقبة من قبل بنك الإمارات دبي الوطني بتتم عبر بنوك عالمية ومؤسسات دولية متخصصة والموضوع مش سر. وإن بنك الإمارات دبي الوطني بيقوم حاليا بإجراء فحص شامل لبنك القاهرة بعد حصوله على موافقة من البنك المركزي المصري، تمهيدا لإتمام عملية الاستحواذ يعني لسه مفيش صفقة ولا فلوس ادفعت ولا اتفاق نهائي ومفيش مليار دولار ادفعت ولا أي حاجة من اللي انتشرت على مواقع التواصل إياها..
وبخصوص عرض المليار دولار فالمصادر قالت إن القيمة المتداولة حاليا لتقييم صفقة الاستحواذ على بنك القاهرة غير صحيحة وإن عملية تقييمه بأقل من قيمته الفعلية عار تماما من الصحة وأن لسه فيه مفاوضات على عرض ضخم للاستحواذ على البنك ممكن يتجاوز 2 مليار دولار ودا مكانش هيتحقق غير بحرص الحكومة لإتمام الصفقة بقيمة تتناسب مع القيمة الحقيقية للبنك وعدم الموافقة على أي عروض بقيمة أقل من قيمته الحقيقية ودا مش مقتصر على صفقة بنك القاهرة بس لكن دا اللي بيحصل وحصل قبل كده في كل الصفقات اللي تمت في برنامج الطروحات الحكومية واللي الدولة مش بتوافق غير على الصفقات اللي بتكون اعلي سعر ومتناسبة مع القيمة الحصص المباعة من الشركات وعشان كده صفقات الاستحواذ بتاخد وقت كبير جدا في التفاوض.
طيب ازاي بيتم تقييم قيمة بنك القاهرة؟
حسب المصادروفيه اكتر من طريقة معتمدة بيتم من خلالها تقييم البنك أولها هي طريقة التدفقات النقدية المخصومة (DCF) والتي بتعتمد على تقدير التدفقات النقدية المستقبلية للبنك وخصمها إلى قيمتها الحالية باستخدام معدل خصم يتناسب مع المخاطر.. اما الطريقة التانية هي طريقة النسب اللي بتقارن البنك ببنوك تانية مماثلة في السوق بناء على نسب تقييم زي نسبة السعر إلى الربح (P/E) أو نسبة السعر إلى القيمة الدفترية (P/B)، والطريقة التالتة فهي طريقة الأصول واللي بتركز على تقييم أصول البنك مع خصم الالتزامات ودا غير إن فيه عوامل تانية بتأثر في السعر زي سعر الصرف خاصة إذا كان فيه تعاملات دولية أو استثمارات بعملات أجنبية وإن انخفاض سعر صرف العملة المحلية ممكن يقلل من قيمة الأصول المقومة بالعملات الأجنبية، بينما ارتفاعه قد يزيد من قيمتها.
