رقم قياسي جديد.. أسعار الذهب رايحة على فين
الذهب رايح فين وامتي توقف القفزات في الأسعار والتوقعات بتقول إيه وايه اللي بيحصل في الصاغة وهل هيتم وقف التداول في الصاغة المصرية.
كلنا متابعين اللي بيحصل في أسعار الذهب اليومين في الصاغة واللي وصلت مستويات قياسية وعيار 24 داخل على 5 آلاف جنيه وعيار 21 داخل على 4500 جنيه بالمصنعية ودي أرقام قياسية طبعا والأخطر أن التوقعات بتقول إن لسه الدهب هيزيد كمان و كمان..
طيب ليه القفزات المستمرة في أسعار المعدن الأصفر ؟
سوق الدهب زي ما قلنا قبل كده سوق حساس جدا لاي توترات سياسية أو اقتصادية أو عسكرية أو حتي في الكوارث الطبيعية الكبيرة وبيزيد الطلب عليه بشكل كبير جدا في أي أزمة من دول عشان سموه الملاذ الآمن واللي بتلجأ ليه البنوك المركزية العالمية التحوط ضد أي مخاطر في أسواق الناتجة عن التوترات السياسية والاقتصادية في العالم.. وطبعا كلنا شايفين اللي بيحصل في العالم وخاصة في الشرق الأوسط والتطور الخطير في الأحداث وفي الممرات الملاحية الدولية وخاصة البحر الأحمر ودا عمل اضطرابات في حركة التجارة الدولية.
وطول ما الأحداث دي مستمرة هيفضل سع الدهب في مصر والعالم يزيد والنهاردة على سبيل المثال سجل الدهب أعلى مستوى ليه على الإطلاق عالميا بسبب زيادة الطلب على الملاذ الآمن والتوترات الجيوسياسية وعدم اليقين بخصوص الرسوم الجمركية الأمريكية والعقوبات وفي وقت العالم بينتظر قرار مجلس الاحتياطي الفيدرالي أو البنك المركزي الأمريكي بشأن السياسة النقدية وبلغ سعر الدهب في المعاملات الفورية 3,036 دولار للأونصة وارتفعت العقود الأمريكية الآجلة للذهب بنسبة 0.1% إلى 3,042. دولار.
ودا غير استمرار قلق المستثمرين من تباطؤ اقتصادي وتزايد مخاطر الركود بسبب الرسوم الجمركية اللي فرضها الرئيس الأميركي دونالد ترامب واللي هتسبب زيادة التضخم ودا عامل جديد هيرفع أسعار الدهب في الأسواق العالمية ومصر طبعاً بتتأثر بشكل مباشر بالسعر العالمي لان مصر بتستورد الدهب بالدولار ودا معناه أن الزيادات مستمرة في الصاغة المصرية والاسعار لسه هترفع.
طيب ياترى لسه الدهب استثمار مربح ؟
اكيد اي استثمار بيكون ليه حدود في الارتفاع والنزول والدهب وصل لمستويات قياسية لكن هيفضل ملاذ آمن ضد تقلبات الأسواق والاسعار وانخفاض قيمة العملة وطول ما الدهب بيرتفع دا معناه إن الطلب عليه بيزيد وإنه لسه استثمار مربح وآمن في الوقت الحالي لكن في الوقت نفسه أي حد عاوز يستثمر في المعدن الأصفر إنه يتابع حركة الأسواق والاسعار وخاصة مع التغيرات والتقلبات السريعة في الأسواق نتيجة الأحداث العالمية ودا بيخلي ناس كتير تفكر كتير قبل ماةتحط فلوسها في الدهب.
طيب الصاغة ممكن توقف التعاملات في مصر ؟
دا إجراء مستبعد دلوقتي وعادة بيتم اللجوء لوقف التداولات ووقف اعلان الأسعار في الظروف الاستثنائية أو في حالة اكتشاف ممارسات غير قانونية أو تلاعب لكن طالما التداولات ماشية مع حركة السوق والاسعار العالمية والمحلية يبقي مش هيحصل أي وقف للتداولات في الصاغة وفي نفس الوقت اللي بيحدد السعر في مصر حجم الطلب على الشراء واللي يظهر كده أنه لسه الإقبال كبير على الشراء خاصة وأننا داخلين على موسم اعياد وزواج.
