هنوصل لـ18 مليون سائح.. شوف أهم قرارات الحكومة لزيادة الإقبال السياحي على مصر
مصر اخذت قرار مهم جدا لزيادة اعداد السائحين الوافدين لمصر، والاعداد المتوقعة هتكون كبيرة جدا... ياتري اية هو القرار ده.. ومصر بتستهدف الوصول لكام سائح مع نهاية 2025.
الحكومة حاليا شغاله علي محاور كتيرة جدا لزيادة الإيرادات الدولارية وتنويع مصادر الدخل الدولاري لمصر من الخارج، واحدة من اهم الابواب اللي الحكومة شغالة عليها لزيادة الإيرادات الدولارية هو قطاع السياحة، وحاليا الحكومة بتستهدف الوصول لتحقيق 18 مليون سائح وتحقيق 18 مليار دولار كايرادات من القطاع.
طيب ازاي الحكومة هتحقق 18 مليون سائح في 2025؟.
الحكومة في الوقت الحالي شغالة علي اكثر من طريق لزيادة التوافد السياحي علي مصر من الخارج، أو الطرق دي هو استمرار العمل ببرنامج تحفيز الطيران العارض خلال فصل الصيف، وده عبارة عن حوافز مالية الحكومة بتديها لشركات الطيران اللي بتجيب وفود سياحية لمصر في فصل الصيف، وده بسبب اأن الاقبال السياحي علي مصر في فصل الصيف بيكون محدود شوية بسبب الارتفاع الكبير في درجات الحرارة .
تاني الطرق اللي شغاله عليها مصر حاليا لزيادة التوافد السياحي هو اطلاق التاشيرات الألكترونية للسائحين، والدولة اعلنت عن اطلاق مجموعة كبيرة من التيسيرات والتسهيلات للحصول على التأشيرة السياحية للجنسيات المختلفة، وده في اطار خطة الحكومة لزيادة الحركة السياحية الوافدة لمصر.
وعلشان نوصل لهدفنا الرئيسي لزيادة حركة السياحة الوافدة لمصر، فالحكومة قررت السماح للسائحين الصينيين بالحصول على تأشيرة دخول اضطرارية من المنافذ والمطارات المصرية، وكمان سمحت للسائحين الهنود من حاملي الإقامة بدول مجلس التعاون الخليجي الحصول على تأشيرة دخول اضطرارية من المنافذ والمطارات المصرية.
مش كده بس لا ده كمان الحكومة قررت السماح للسائحين الأتراك الحصول على تأشيرة دخول اضطرارية من المنافذ والمطارات المصرية المختلفة دون التقيد بسن محدد، وكمات سمحت للسائحين الجزائريين والمغاربة الوافدين في أفواج سياحية الحصول على تأشيرة دخول اضطرارية من المنافذ والمطارات المصرية، وكمان سمحت للسائحين الإيرانيين الوافدين مباشرة إلى جنوب سيناء الحصول على تأشيرة اضطرارية بكفالة الشركات السياحية، ده غير أنه تم استحداث تأشيرة متعددة الدخول صالحة لمدة 5 سنين بقيمة 700 دولار لدخول السائحين علي فترات متعددة من السنة .
