الإمارات داخلة مصر على تقيل.. مشروعات بمليارات الدولارات في السياحة
يا ترى إيه اللي بيخلّي الإمارات تهتم أوي كده بالسياحة في مصر؟ وهل الموضوع مجرد فلوس واستثمار ولا فيه حاجة أكبر من كده؟ وليه دايماً بنسمع عن مشروعات إماراتية ضخمة في حتت زي الأهرامات ورأس الحكمة والعاصمة الإدارية؟ وأهم حاجة مصر بتقدم إيه للشركات الإماراتية عشان تجذبهم بالشكل ده؟
دولة الإمارات العربية الشقيقة بقالها فترة كبيرة عينيها على الاستثمار في مصر.. بس السنين الأخيرة دي الاهتمام زاد بشكل ملحوظ خصوصاً في مجال السياحة.. عشان مصر بالنسبة لهم مش مجرد بلد جنبهم في المنطقة.. لا.. دي كنز سياحي عالمي… عندها الأهرامات، النيل، الساحل الشمالي، أسوان.. كل حتة في مصر فيها حاجة مميزة .. والإمارات شايفة إن السوق السياحي المصري لسه فيه مجال كبير للتطوير وده بيفتح الباب لاستثمارات ضخمة.
طب إيه سر الاهتمام ده؟
الإمارات عندها استراتيجية واضحة.. وهي تنويع الاقتصاد بعيد عن النفط.. والسياحة في مصر بتوفرلهم فرصة ذهبية عشان يحطوا فلوسهم في مشروعات بتجيب عائد كبير على المدى الطويل. تاني حاجة.. العلاقة بين مصر والإمارات قوية جداً على كل المستويات سواء سياسيا أو اقتصاديا وده بيخلّي الاستثمار في مصر أمان بالنسبة ليهم.. وتالت حاجة الإمارات عندها خبرة رهيبة في إدارة المشروعات السياحية الكبيرة زي اللي بنشوفه في دبي وأبوظبي، فبتنقل التجربة دي لمصر عشان تستفيد منها.
نيجي بقى لأهم المشروعات اللي الإمارات بتستهدفها في مصر. من يومين بس شركة أبوظبي للاستثمارات السياحية أعلنت عن مشروع فندق جديد جنب الأهرامات في الجيزة، بتكلفة 120 مليون دولار، يعني حوالي 440 مليون درهم إماراتي.. الفندق ده هيبقى فيه 302 غرفة، وده جزء من خطة أكبر عشان يزودوا عدد الغرف اللي بيديروها في مصر.. اللي حالياً وصل لـ1500 غرفة.
يحيى قطب، المدير التنفيذي للشركة قال إنهم مش هيقفوا عند الجيزة، لا، عينيهم على وسط القاهرة، العاصمة الإدارية الجديدة، جنوب مصر، الساحل الشمالي، مرسى علم، وأسوان. ومش بس كده، هما كمان مهتمين بالسياحة البيئية في الواحات، يعني بيفكروا في كل حتة في البلد.
مشروع تاني كبير هو صفقة رأس الحكمة، اللي اتعلن عنها السنة اللي فاتت 2024. الشركة القابضة الإماراتية بتشتغل على تطوير المنطقة دي باستثمارات وصلت لـ35 مليار دولار..و الهدف تحويل الساحل الشمالي لمصر لوجهة سياحية عالمية زي اللي بنشوفها في الريفييرا الفرنسية.. وده مش كلام في الهوا، ده مشروع بيخلّص فعلاً وبيجذب ملايين السياح.
قبل كده كمان، في 2024، الإمارات استحوذت على حصة كبيرة في مجموعة 'آيكون' السياحية التابعة لطلعت مصطفى، ودخلت في 7 فنادق تاريخية في مصر.. يعني باختصار الإمارات شايفة إن السياحة في مصر بتمثل فرصة استثمارية ما تتفوتش سواء في الفنادق الفخمة أو المناطق السياحية الجديدة.
ومصر بتقدم إيه للشركات الإماراتية عشان تجذبهم؟
أول حاجة، تسهيلات حكومية كبيرة. من ساعة صفقة رأس الحكمة، الحكومة المصرية بتدي أولوية للمستثمرين الإماراتيين، سواء في تخصيص الأراضي أو تسريع الإجراءات. تاني حاجة ، الأسعار التنافسية.. الأرض في مصر، مقارنة بغيرها في المنطقة، سعرها معقول، وده بيخلّي المشروعات مربحة. تالت حاجة السوق المصري نفسه كبير، عندك 100 مليون مواطن بالإضافة لملايين السياح اللي بييجوا كل سنة، يعني الطلب على السياحة مضمون.
