الكويت داخلة مصر بتقلها.. مشروعات ضخمة في كل المجالات

يا ترى إيه اللي بيحصل بين مصر والكويت دلوقتي.. ليه الكويت بقت مهتمة أوي تستثمر عندنا.. وهل فعلاً فيه مليارات جاية في الطريق.. لو مهتم تعرف إجابات الأسئلة دي.. تابع الفيديو للآخر لأن الموضوع كبير وفيه فلوس كتير وخطط أكبر.

الكويت البلد الخليجي الشقيق.. قررت تضخ استثمارات جديدة عندنا.. ومش أي استثمارات.. دي حاجة كبيرة بجد.. والأرقام بتتكلم بنفسها.. خلينا نكتشف سوا إيه اللي بيحصل.. وإيه أهم المجالات اللي الكويت بتبص عليها عندنا.. وكام الفلوس اللي موجودة دلوقتي واللي متوقعة في المستقبل

أول حاجة لازم نعرفها.. الكويت عينها على الاستثمار فى مصر من زمان.. لكن دلوقتي الخطط بقت أوضح وأكبر.. حسب آخر الأخبار الكويت عايزة تزود استثماراتها فى مصر بنسبة 20% في 2025.. يعني الاستثمارات هتقفز من حوالي 4.4 مليار دولار دلوقتي لـ 5.3 مليار دولار خلال السنة الجاية.. ودي مجرد بداية.. لأن فيه مصدر حكومي قال إن الاستثمارات الكويتية في مصر ممكن تتعدى 10 مليار دولار في السنين الجاية.. تخيلوا الكلام ده.. 10 مليار دولار.. يعني مشروعات وفرص شغل وتطوير كبير في كل حتة

طب الكويت بتفكر تستثمر في إيه عندنا؟

الموضوع مش عشوائي خالص.. فيه مجالات محددة والكويت عينها عليها زي الصقر.. أولاً.. بيحاولوا يشتروا حصص في شركات حكومية مصرية.. يعني من ضمن برنامج الطروحات الحكومية اللي مصر شغالة عليه.. مش بس كده.. الشركات الكويتية عايزة تنافس على إدارة المطارات المصرية.. ودي لو حصلت هتبقى قفزة كبيرة في قطاع الطيران عندنا.. تخيل الكويت تدير مطارات زي مطار القاهرة أو الأقصر.. ده معناه فلوس وخبرة كبيرة تدخل البلد

ونيجي للمجالات التانية اللي الكويت مركزة عليها.. فيه حاجات زي صناعة الدوا.. يعني مصانع أدوية ومستحضرات تجميل.. وده مهم أوي لأن السوق المصري محتاج تطوير في القطاع ده.. كمان الأمن الغذائي.. يعني مشروعات زراعة وصناعات غذائية وصوامع تخزين.. عشان نضمن إن الأكل يكفي الكل.. وما ننساش السياحة.. الكويت عايزة تبني فنادق جديدة في الساحل الشمالي الغربي ومنطقة البحر الأحمر.. ودي مناطق لو اتعملت فيها مشروعات كبيرة هتجذب سُياح من كل حتة في العالم..

مش بس كده.. فيه خطط لاستثمارات في تصنيع العربيات.. والطاقة المتجددة زي الطاقة الشمسية والهيدروجين الأخضر.. وكمان النقل الجماعي والبنوك والعقارات.. يعني الكويت بتفكر في كل حاجة تقريباً.. وده بيخلينا نسأل.. ليه مصر بالذات.. الإجابة بسيطة.. مصر فيها فرص كبيرة.. سوق ضخم.. وعدد سكان كبير.. وكمان الحكومة المصرية بتدي تسهيلات زي الرخصة الذهبية للمستثمرين.. وده اللي قاله الدكتور مصطفى مدبولي رئيس الوزراء للمسؤولين الكويتيين في زيارته للكويت فبراير اللي فات

خلينا نركز شوية على الزيارة دي.. لأنها كانت نقطة تحول.. يوم 22 و23 فبراير 2025.. مدبولي راح الكويت.. وقابل مسؤولين هناك.. واتفقوا على تعزيز التعاون الاقتصادي.. المسؤولين الكويتيين قالوا إنهم مستعدين يعملوا مشروعات صناعية كبيرة عندنا.. ومدبولي وعدهم بكل التسهيلات.. من رخص ذهبية لتأسيس مصانع جديدة.. لحد دعم كامل للمستثمرين.. وكمان قال إن رئيس الوزراء الكويتي هييجي مصر قريب يعلن عن مشروعات جديدة.. يعني الفترة الجاية هتبقى مليانة أخبار حلوة..

لو بصينا على الوضع دلوقتي ..حجم الاستثمارات الكويتية في مصر كام؟

حالياً الكويت ليها حوالي 1431 مشروع في مصر.. وده ببخليها في المركز الخامس عالمياً والتالت عربياً بين الدول المستثمرة عندنا.. بعد الإمارات والسعودية.. حجم التبادل التجاري بينا وبينهم حوالي 3 مليارات دولار سنوياً.. وده رقم كويس.. لكن اللي جاي أكبر.. لو الخطط مشيت زي ما متوقع.. الـ 5.3 مليار دولار في 2025 هتبقى مجرد البداية.. والـ 10 مليارات دولار هتتحقق على المدى الطويل..

والحلو في الموضوع إن الكويت مش بتستثمر في مصر عشان فلوس بس.. لا.. ده تعاون بين بلدين شقيقين عايزين يبقوا أقوى سوا.. مصر بتقدم السوق الكبير والفرص.. والكويت بتجيب الفلوس والخبرة.. ولو المشروعات دي نجحت.. هنشوف تطور كبير في الصناعة.. السياحة.. والاقتصاد كله