الدولار كل يوم في النازل.. إيه اللي بيحصل في سوق صرف العملات الأجنبية؟
يا ترى إيه اللي بيحصل في سعر الدولار في مصر دلوقتي؟ة ليه بعد ما كان طالع زي الصاروخ بدأ يهدى ويتراجع؟ وليه في ناس بتقول إن الاستقرار ده ممكن يكون مجرد هدوء مؤقت؟ لو بتسأل نفسك السؤال ده.. أو حتى لو مستغرب الحركة الغريبة في سعر العملة الأمريكية مؤخرًا.. يبقى لازم تسمع الكلام ده للآخر.. النهاردة هنكشف معاك سر استقرار سعر الدولار في مصر.. وهنفهم ليه بدأ يتراجع بعد موجة صعود جامدة.. وإيه علاقة كل ده بصرف شريحة جديدة من قرض صندوق النقد الدولي؟
أول حاجة لازم نفهمها.. الدولار في مصر مش مجرد عملة بنشتري بيها حاجات من برا.. لا.. ده زي البوصلة اللي بتحدد اتجاه الاقتصاد كله.. لما بيطلع.. الأسعار بتطلع وراه.. ولما بيهدى.. الناس بتبدأ تاخد نفسها وتحس إن في أمل.. آخر فترة.. الناس لاحظت إن سعر الدولار في السوق الرسمية بدأ يستقر حوالين الـ50 جنيه.
طب إيه السر ورا الهدوء ده؟
لو بصينا على الصورة الكبيرة.. هنلاقي إن فيه عوامل كتير .. أول حاجة.. قرار البنك المركزي المصري بتحرير سعر الصرف من مارس 2024 لما ساب الجنيه يتحرك حسب العرض والطلب.. ده كان بداية نقطة تحول.. الدولار فعلاً طلع بسرعة في الأول.. لكن مع الوقت بدأت الحكاية تتغير.. عشان فيه حاجات تانية دخلت على الخط.. ومنها حاجة مهمة جدًا.. قرض صندوق النقد الدولي.
صندوق النقد الدولي.. يا جماعة.. ده زي الصديق اللي بيمد إيده ليك في وقت الزنقة.. بس بشرط إنك تسمع كلامه.. مصر دلوقتي بتتعامل مع برنامج قرض بـ8 مليار دولار.. و فيه شريحة جديدة متوقع تصرف قريب.. حوالي 1.2 مليار دولار.
طب الشريحة دي ليها علاقة إزاي بالدولار؟
ببساطة.. لما الحكومة بتاخد الدولارات دي.. بتضخها في السوق عبر البنوك.. وده بيزود المعروض من العملة الصعبة.. والاقتصاد بيقولك.. لما المعروض بيزيد.. السعر بيقل أو على الأقل بيستقر.
بس مش كده وبس.. فيه حاجات تانية ساعدت.. مثلاً.. تحويلات المصريين في الخارج بدأت ترتفع تاني.. ودي مصدر مهم جدًا للدولار.. كمان الاحتياطي النقدي الأجنبي بتاع مصر بقى في تحسن مستمر.. وده بيدي ثقة للسوق إن الحكومة عندها سيولة تدير بيها الأزمة.. وما ننساش إن الدولة ضربت على إيد المضاربين في السوق السوداء بقوة الفترة اللي فاتت.. فالطلب على الدولار من برا البنوك قل.. وده كمان ساعد على الاستقرار
يعني باختصار.. الدولار بدأ يتراجع ويستقر عشان فيه دولارات جديدة داخلة من صندوق النقد.. وتحويلات المصريين بترجع.. والسوق السوداء أخدت على قفاها.. بس.. وده مهم.. الخبراء بيقولوا إن الاستقرار ده ممكن ما يدومش لو التوترات الجيوسياسية زي الحروب أو الأزمات العالمية شدت تاني.. كمان.. مصر لسه قدامها التزامات خارجية كبيرة لازم تسددها.. فالدولار ممكن يرجع يتحرك لو ما فيش خطة محكمة للتعامل مع التدفقات الدولارية.
