مصر والهند شغالين على مشروعات هتعمل قلبان.. إيه حكاية الأمونيا الخضراء؟
في الساعات الأخيرة تم الكشف عن تعاون كبير ومهم بين مصر والهند وخطط لمشروعات ضخمة في مجال الأمونيا الخضراء.. فيا ترى إيه هي الأمونيا الخضراء دي.. وإزاي هتغير مستقبل الطاقة في مصر.. وإيه حجم الاستثمارات اللي هتضخها الدولتين في المشروعات دي.
في الفترة الأخيرة مصر بتسعى لتعزيز استثماراتها في مجال الطاقة المتجددة وخصوصًا في إنتاج الأمونيا الخضراء.. فوي زيارة رسمية للهند المهندس حسن الخطيب وزير الاستثمار والتجارة الخارجية اجتمع مع الرئيس التنفيذي التجاري لشركة تاتا للكيماويات لبحث سبل التعاون الاستثماري وتعزيز الشراكة الاقتصادية بين البلدين.
اللقاء ده استعرض فرص توسيع الاستثمارات الهندية في مصر خاصة في قطاع الصناعات الكيماوية والطاقة المتجددة وده لأن شركة تاتا للكيماويات تُعتبر من الشركات الرائدة عالميًا في المجالات دي.
من ضمن المشروعات المشتركة اللي تم مناقشتها اتفاقية التعاون بين الحكومة المصرية وشركة PowerOcior الهندية للطاقة المتجددة واللي بتهدف لإنشاء مشروع متكامل لإنتاج الأمونيا الخضراء من الهيدروجين الأخضر باستثمارات تبلغ 4.2 مليار دولار.. المشروع ده متوقع إنه يبدأ تشغيل المرحلة الأولى منه في الربع الأول من عام 2027.
طب ايه هى الامونيا الخضرا دي؟
الأمونيا الخضراء.. هي مادة كيميائية بتُنتج عن طريق تفاعل النيتروجين مع الهيدروجين الأخضر واللي بيتم إنتاجه باستخدام مصادر الطاقة النظيفة زي الشمس والرياح.. الأمونيا دي ممكن تُستخدم في توليد الكهرباء وإنتاج وقود نظيف للشاحنات وسفن الشحن لمسافات طويلة وكمان كسماد غير ملوث للبيئة.. وفي نوفمبر 2023 مصر نجحت في تصدير أول شحنة أمونيا خضراء في العالم للهند وده بيعكس التقدم اللي حققته مصر في المجال ده.
بالإضافة للمشروع ده في يوليو 2024 تم توقيع اتفاقية مشروع إنتاج الأمونيا الخضراء بمدينة دمياط بين الشركة المصرية القابضة للبتروكيماويات وشركة مصر لإنتاج الأسمدة "موبكو" وشركة سكاتك النرويجية وشركة "يارا" النرويجية بهدف تعميق إنتاج الأمونيا الخضراء محليًا..
كمان في المنطقة الصناعية بالعين السخنة تم إنشاء مشروع لإنتاج الهيدروجين الأخضر بقدرة 100 ميجاوات بالشراكة بين صندوق مصر السيادي وشركة أوراسكوم للإنشاءات وشركة سكاتك النرويجية وشركة فيرتيجلوب.. المشروع ده بيهدف لإنتاج نحو 13 ألف طن سنويًا من الهيدروجين الأخضر اللي هيتم تحويله إلى حوالي 70 ألف طن من الأمونيا الصادرة من الطاقة المتجددة.
وفي 30 يونيو 2024 صندوق مصر السيادي والمنطقة الاقتصادية لقناة السويس وقعوا أربع اتفاقيات بقيمة 33 مليار دولار في مجال الأمونيا الخضراء وده بيعكس التزام مصر بتعزيز استثماراتها في الطاقة المتجددة..
مشروع بنشمارك خليج السويس لإنتاج الأمونيا الخضراء هو كمان من المشروعات البارزة في المجال ده.. المشروع ده بيهدف لبناء منشأة للتحليل الكهربائي بقدرة 400 ميجاوات واللي هتستخدم الطاقة المتجددة بالكامل لإنتاج 183 طن يوميًا من الهيدروجين الأخضر وإنتاج 1000 طن يوميًا من الأمونيا الخضراء.. إجمالي استثمارات المشروع بتبلغ حوالي مليار دولار وده بيعكس حجم الاستثمارات الكبيرة في المجال ده..
الاستثمارات دي بتعكس التزام مصر بتعزيز دورها كمركز إقليمي لإنتاج وتصدير الهيدروجين الأخضر والأمونيا الخضراء .. وكمان بتعكس التعاون الوثيق بين مصر والهند في المجال ده.. مع توافر الموارد الطبيعية والبنية التحتية اللازمة مصر في طريقها لتحقيق تقدم كبير في مجال الطاقة المتجددة وده هيساهم في تحقيق التنمية المستدامة وتوفير فرص عمل جديدة.
المشروعات دي مش بس هتعزز من مكانة مصر في سوق الطاقة المتجددة لكنها كمان هتساهم في تحقيق أهداف التنمية المستدامة وتقليل الانبعاثات الكربونية وده بيمثل خطوة مهمة نحو مستقبل أكثر استدامة.
