رسايل الرئيس السيسي عن الاقتصاد وقناة السويس ومفاجأة سارة
الرئيس السيسي قال إيه عن الاقتصاد وايه الرسالة اللي وجهها للمصريين في الساعات الأخيرة وايه اللي بيحصل في قناة السويس والمنطقة حولينا وحكاية ال800 مليون دولار اللي بتضيع كل شهر.
السيسي في الساعات الأخيرة الرئيس السيسي حضر افطار القوات المسلحة وزي العادة الرئيس اتكلم بصراحة عن الأوضاع في مصر وخاصة الأوضاع الاقتصادية والمخاطر اللي حولينا في المنطقة والفاتورة اللي بتدفعها مصر نتيجة التوترات في الإقليم اللي حولينا.. الرئيس قال إن مصر بتخسر شهريا 800 مليون دولار نتيجة تأثر قناة السويس بالاحداث في اليمن وجنوب البحر الاحمر ودا رقم كبير جدا واستمراره لفترة طويلة حرم مصر من مورد مهم جدا في وقت الدولة محتاجة فيه كل دولار عشان تستمر في التنمية والتطوير والتعمير..
لكن الرئيس السيسي قال حاجة مهمة جدا امبارح وهي إن الأمور في تحسن مستمر وإن المؤشرات الاقتصادية إيجابية رغم الظروف الصعبة اللي بتمر بيها العالم ومنطقة الشرق الأوسط وقال إن مصر استطاعت التحرك بخطى ثابتة ومدروسة رغم التحديات اللي واجهتها خلال السنين اللي فاتت بما فيها الأزمات الاقتصادية وقال الرئيس نصا (خلال السنتين اللي فاتوا كانت الظروف صعبة جدًا الحقيقة .. بس بنطمكم الأمور في تحسن بإذن الله.. نصيحتي متبوصش وراك غير للعلم وتفادي الأخطاء).
الرئيس السيسي أشار الى موافقة صندوق النقد الدولي على صرف شريحة جديدة لمصر ودا مؤشر مهم على تحقيق الاقتصاد المصري نتائج إيجابية وأشاد السيسي بدور الشعب المصري وتماسكه وقوة مؤسسات الدولة وخصوصًا القوات المسلحة والشرطة المدنية ودورهم في هذه الأوقات الاستثنائية ووجه الرئيس رسالة طمأنة للشعب المصري وقال إنه مدرك القلق اللي بيعيشه المصريين بسبب الأحداث الراهنة وأكد أن عملية تطوير المجتمع المصري وفق خطوات مدروسة عملية مستمرة..
من كلام الرئيس السيسي نقدر نقول إنها رسالة مهمة جدا للمصريين أن زمن الأزمات الكبيرة انتهي وإن المؤشرات الاقتصادية كلها بتقول إن مصر ماشية كويس جدا في ملف الاقتصاد والتنمية باستثناء اللي بيحصل في البحر الأحمر ونزيف الخساير في قناة السويس نتيجة تأثر حركة الملاحة لكن في النهاية المحصلة بتقول إن مصر عبرت عنق الأزمة وأنها كل يوم بتحقق مكاسب اقتصادية جديدة في قطاعات الاستثمار والتصنيع والنمو وفي السياحة وفي البناء والتعمير.
