انفراجة قوية جدا في أزمة الدولار.. البنك المركزي يعلن الخبر السعيد
من ساعات البنك المركزي أعلن عن تحقيق صافي الأصول الأجنبية فائض كبير مع بداية عام 2025 بقيمة تقترب من 12 مليار دولار.. فياترى ايه معنى الكلام ده ؟ وإيه هي الأصول الأجنبية أصلاً وأهميتها للاقتصاد؟ وإمتى بترتفع وإمتى بتنخفض؟
صافي الأصول الأجنبية ببساطة هو الفرق بين ما يملكه البنك المركزي من عملات أجنبية (الأصول) وما عليه من التزامات بالعملات الأجنبية (الخصوم)..و لما يكون عندنا فائض ده معناه إن الأصول أكبر من الالتزامات والعكس صحيح.. وخد بالك المؤشر ده بيعتبر مقياس مهم لقوة واستقرار الاقتصاد لأنه بيعكس قدرة البلد على الوفاء بالتزاماتها الخارجية وتوفير احتياطي آمن من العملات الأجنبية.
طب إيه هي الأصول الأجنبية؟
الأصول الأجنبية بتشمل كل ما يملكه البنك المركزي من عملات صعبة زي الدولار واليورو.. بالإضافة لاحتياطيات الدهب والاستثمارات في السندات والأوراق المالية الأجنبية..و الحاجات دي بتستخدم لتلبية احتياجات الاستيراد و سداد الديون الخارجية والتدخل في سوق الصرف للحفاظ على استقرار العملة المحلية.
وإيه أهمية الأصول الأجنبية للاقتصاد؟
وجود احتياطي قوي من الأصول الأجنبية بيدّي ثقة للمستثمرين الأجانب في الاقتصاد المصري.. وبيساعد في الحفاظ على استقرار الجنيه المصري قدام العملات الأجنبية.. كمان بيوفر أمان في مواجهة الأزمات الاقتصادية العالمية وبيضمن قدرة البلد على استيراد السلع الأساسية حتى في الظروف الصعبة.
طب إمتى بترتفع وإمتى بتنخفض الأصول الأجنبية؟
الأصول الأجنبية بترتفع لما يكون فيه تدفقات دولارية داخلة للبلد أكتر من الخارجة.. زي زيادة في الصادرات وارتفاع في إيرادات السياحة وتحويلات المصريين العاملين بالخارج أو استثمارات أجنبية مباشرة.. على الجانب التاني بتنخفض لما تزيد المدفوعات بالدولار عن الإيرادات زي زيادة في الاستيراد وسداد ديون خارجية أو خروج استثمارات أجنبية.
وخلينى أقولك شوية معلومات مهمة عن تطورات صافي الأصول الأجنبية في مصر.. في مايو 2024 البنك المركزي أعلن عن تحول صافي الأصول الأجنبية من عجز لفائض لأول مرة من مارس 2022 بقيمة تعادل 458 مليار جنيه بنهاية مايو 2024 مقابل عجز 36 مليار جنيه في أبريل 2024.. التحول ده استمر ووصل الفائض لـحوالى 11 مليار دولار بنهاية ديسمبر 2024.. وفي يناير 2025 زاد الفائض ده ووصل لـ 11.991 مليار دولار.
طب إيه اللي ساهم في التحسن ده؟
التحسن ده جه نتيجة عدة عوامل، منها صفقة رأس الحكمة.. في فبراير 2024 الحكومة باعت حقوق تطوير منطقة رأس الحكمة على الساحل الشمالي باستثمارات تقدر بـ35 مليار دولار..و في مارس 2024 مصر وقّعت على حزمة دعم مالي بقيمة 8 مليار دولار مع الصندوق.. كمان مع استقرار الأوضاع الأمنية وزيادة الترويج السياحي ارتفعت إيرادات السياحة بشكل ملحوظ..و تحويلات المصريين العاملين بالخارج سجلت ارتفاعات كبيرة وده دعم الاحتياطي من العملات الأجنبية.
ليه الموضوع ده مهم لينا؟
الفائض في صافي الأصول الأجنبية بيعني إن الاقتصاد المصري في وضع أقوى لمواجهة التحديات الخارجية وبيساعد في الحفاظ على استقرار الأسعار وسعر الصرف.. وده بينعكس بشكل إيجابي على حياة المواطنين لأنه بيساهم في استقرار أسعار السلع والخدمات.. وبيزيد من ثقة المستثمرين في الاقتصاد المصري وبيفتح فرص عمل جديدة ويحسن من مستوى المعيشة.
