رجع يرفع تاني.. أسباب حركة اسعار الدولار في مصر
الدولار في الساعات الأخيرة بدأت يرتفع بشكل جديد، وناس كتيرة قلقانة من الزيادة دي.. ياتري اية اسباب زيادة سعر صرف الدولار مؤخرا.. وهل سعر صرف الدولار هيفضل مكمل في الزيادة.
الفترة الحالية الاقتصاد العالمي بيعيش حالة من التقلبات الشديدة وده بعد التصريحات والقرارات الاخيرة للرئيس الامريكي دونالد ترامب واللي رجع للبيت الأبيض من جديد وفي ولاية جديدة، بفرض رسوم جمركية علي الورادات للسوق الامريكي، واللي أكد أن الهدف منها هو حماية الاقتصاد الامريكي.
القرارات الاخيرة للرئيس الأمريكي دونالد ترامب والرد اللي جه عليها من دول الاتحاد الأوروبي والصين وعدد كبير من دول العالم واللي قرارات الرئيس الامريكي هتكون لها تاثير مباشر عليهم، أعلنت انها مش هتقف ساكتة وأنها هتكون لها رد علي القرارات دي في الوقت المناسب، وده عامل حاجة من القلق وتوترات اقتصادية جديدة علي مستوي العالم، وعملت ازمة في البورصة العالمية للتجارة، خصوصا أن التوترات دي موجودة بين أكبر قوي اقتصادية في العالم.
طيب اية علاقة التوترات اللي موجودة بين الولايات المتحدة الأمريكية والصين ودول الاتحاد الأوروبي وسعر الدولار في مصر؟.
التوترات الاقتصادية اللي بقت موجودة بين الولايات المتحدة الأمريكية والصين ودول الاتحاد الأوروبي عملت تاثير مباشر علي الاسعار بشكل عام، وبقي لها تاثير مباشر علي الاقتصاد الدولي بشكل كامل، ومصر واحدة من الدول االلي تاثير بالقرارات الاخيرة، خصوصا أن الدولار واحد من اهم العملات للاقتصاد العالمي بشكل عام ومصر بشكل خاص.
أول حاجة بدأت تتاثير بالتوترات الأقتصادية الموجودة دولوقتي هيا اسعار الذهب العالمية واللي شهدت زيادة غير مسبوقة اثرت علي سعر الذهب في مصر، خصوصا أن سعر الجرام عيار 21 حاليا داخل علي 4200 جنية للجرام، ودي أول مرة اسعار الذهب توصل للرقم ده، حتي قبل القرارات الاقتصادية اللي اقرتها الحكومة المصرية في مارس 2024 واللي كانت خاصة بتحرير اسعار صرف العملات الأجنبية في مصر بشكل مرن قدام الجنية المصري والفترة دي كانت فيها السوق السودا في التجارة بالعملات موجودة ومولعة في مصر ... برضوا الذهب موصلش للرقم ده.
ثاني حاجة اتاثرت بالتوترات الاقتصادية الحالية هيا اسعار الدولار في العالم ومنهم مصر، وسعر صرف الدولار في كل دول العالم بدأ يتحرك، خصوصا أن مفيش اي دلالات بتأكد أو تمهد لانتهاء التوترات السياسية الي موجودة بين الولايات المتحدة الامريكية ودول العالم، خصوصا أن الدولار مكون رئيسي للاحتياطي النقدي لكل الدول في العالم ومنهم مصر، ومتوقع كمان أن الدولار يكمل صعود الفترة اللي جاية وده مهلوش اي علاقة بالاقتصاد المصري ولا له علاقة بتحرير جديد لسعر الصرف في مصر، والسبب في كل اللي بيحصل ده واللي ممكن تشوفه أو تسمعه الفترة اللي جاية هيا التوترات الاقتصادية اللي لها تاثير علي كل دول العالم.
