ليه جائحة الدولار مش هترجع تاني.. ايه اللي مخبيه المركزي
هو ارتفاع الدولار يقلق بجد ولا دا حكم السوق والعرض والطلب وعشان نبسطه لحضرتك الأسباب اللي خلته ينزل في الأسابيع اللي فاتت هي نفسها الأسباب اللي خلته يرفع بمعني أن السوق الحر لسعر الصرف هو اللي بيحدد دا وبالتالي طبيعي جدا الدولار ينزل ويرفع لكن السؤال الأهم هنا هل ممكن أزمة 2022 ترجع تاني بحجمها بمعني الدولار يختفي من الأسواق والسوق الموازية ترجع تاني .. الحقيقة دا مش ممكن يحصل دلوقتي ولا في المستقبل ودا مش كلامنا لكن دا اللي بتقوله الأرقام والبيانات والتوقعات لأن شح العملة الأمريكية وتوافرها مرهون بقدرة الدولة على توفيره بمعني أن موارد الدولار في مصر تفضل زي ما هي أو تزيد.
طيب ليه احنا متأكدين أن أزمة الدولار الحادة مش هيحصل تاني؟
دي لأسباب كتير زي ما قلنا الأرقام هي اللي بتتكلم هنا ومصر عندها 5 مصادر أساسية للدولار وهي السياحة وتحويلات المصريين وقناة السويس والتصدير والاستثمار الأجنبي اللي بيضخ عملة صعبة لعمل مشروعات ولو رجعنا لأرقام 2024 هنلاقي إن كل مصادر الدولار حققت قفزات قياسية باستثناء قناه السويس لظروف كلنا عارفينها ومثلا قطاع السياحة حقق موسم تاريخي بإيرادات داخلة على 16 مليار دولار ووصلت تحويلات المصريين بالخارج الي 27 مليار دولار تقريبا ووصل حجم الصادرات ل40 مليار دولار أما حجم الاستثمارات اللي دخلت مصر فكانت تاريخية وغير مسبوقة ووصلت 46 مليار دولار بعد صفقة رأس الحكمة ورغم الأزمة اللي بتعاني منها قناة السويس فهي حققت حوالي 4 مليار دولار في اسوأ موسم ليها لأسباب خارجة عن الإرادة.
من الاسباب التانية اللي بتأكد إن أزمة الدولار الصعبة مش هيحصل تاني هي أن الدولة كانت بتتحكم في سعر الصرف فكان طبيعي تظهر السوق السودا للعملة لأن سعر الدولار في البنوك ثابت في وقت تجار العملة بيشتروه بمبالغ اعلي لكن دلوقتي الوضع اختلف لأن البنك المركزي حرر سعر الجنيه وخلاه حر وطول ما فيه سعر حر عمر السوق الموازية ما هترجع تاني.. كمان أزمة 2022 كانت صعبة لأنها تزامنت مع ارتفاع أسعار السلع عالميا بشكل غير مسبوق نتيجة الصراعات الجيوسياسية ومصر بتستورد بمبالغ ضخمة قريت على 100 مليار دولار وكمان كان مطلوب منها تسدد ديون ضخمة في وقت كان فيه شح في الدولار على العكس دلوقتي مصر بتسديد من فائض الدولار عندها.
ومع التوقعات اللي بتأكد ان كل موارد مصر من الدولار هتحقق أرقام قياسية تانية في 2025 يبقي الدولار هيفضل تحت السيطرة.
كمان مصر بدأت خطط توطين الصناعة بشكل غير مسبوق ودا هيوفر كتير في فاتورة الاستيراد بجانب الانفراجة الكبيرة في ملف البترول والغاز مع زيادة عمليات تنمية الحقول واستئناف عمليات التنقيب من تاني بعد ما الشركات خدت الجزء الأكبر من مستحقاتها ودا هيوفر مليارات تانية كانت رايحة على استيراد الوقود.
طيب المركزي مخبي ايه عشان أزمة الدولار متتكررش تاني؟
المركزي شغال ليل نهار على ضمان توفير الدولار من كل القطاعات وعن طريق مبادرات مبتكرة وقدر ونجح في دا بدليل أنه قدر يحقق احتياطي نقدي تاريخي ولسه في جراب المركزي الكتير عشان يضمن استمرار تدفق الموارد الدولارية زي مبادرات استبدال الديون بالاستثمارات ودا ملف اتحرك فيه حسن عبدالله محافظ المركزي شخصيا وغير تفعيل مبادرات تانية لتسهيل تحويلات المصريين من الخارج عن طريق تطبيقات حديثة من خلال البنوك.
