هتحقق مكاسب بالملايين.. شوف إزاي الحكومة هتطور شركة مصر للألومنيوم
يا ترى إزاي الحكومة هتطور شركة مصر للألومنيوم، هل هتنفذ فيها مشروعات جديدة تقدر تحول الخسائر لأرباح، وتكون قاطرة شركات قطاع الأعمال في الفترة الجاية، ولا ممكن تطرحها على مستثمر اجنبي، يا ترى إيه اللي هيحصل في الشركة في الفترة الجاية.
في الساعات الأخيرة، المهندس محمد شيمي وزير قطاع الأعمال العام، عمل جمعية عمومية للشركة القابضة للصناعات المعدنية، وناقش خلالها تطوير شركة مصر للألومنيوم، وأكد أنها هتتحول لقاطرة تنمية خلال الفترة الجاية.
ونقدر نقول، إن مشروعات التطوير في مصر للألومنيوم، بتشمل إعادة تأهيل المصنع القائم بطاقة 310 آلاف طن، وكمان إنشاء محطة للطاقة الشمسية بطاقة 1 جيجاوات لإمداد مجمع الألومنيوم بالطاقة النظيفة، وماكينة انتاج سلك الألومنيوم لمضاعفة الطاقة الإنتاجية من منتج السلك إلى 120 ألف طن.
كل ده بجانب إنشاء خط لإنتاج أقراص العبوات الدوائية بطاقة 300 طن شهريا، ومشروع إعادة تدوير الخبث بطاقة 8000 طن سنويا بهدف إنتاج معدن الألومنيوم وتقليل التلوث الناتج عن عمليات التداول والتخزين وضمان التدوير بطريقة آمنة، وصومعة لتخزين الألومينا لإضافة طاقة تخزينية 50 ألف طن.
عشان كده، شركة مصر للألومنيوم ناوية كمان تنشأ مصهر جديد للألومنيوم بطاقة 600 ألف طن، ومشروع زيادة الطاقة الإنتاجية للمصهر الحالي بشركة مصر للألومنيوم بطاقة 200 ألف طن، وإنشاء مصفاة للألومنيا بطاقة 2 مليون طن سنويا، ومشروع إنتاج رقائق الألومنيوم (الفويل) بطاقة 50 ألف طن.
وبلغة الأرقام، فشركة مصر للألومنيوم، حققت خلال السنة المالية اللي فاتت، صافي ربح بلغ 9.32 مليار جنيه خلال الفترة من يوليو 2023 لحد يونيو 2024، مقابل أرباح بلغت 3.69 مليار جنيه في العام المالي المقارن.
ونقدر نقول إن الشركة دي لو بالفعل نجحت عملية تطويرها، هتقدر تحقق التكامل بين الشركات التابعة وتوسع في الشراكات مع القطاع الخاص، وكمان تحفز الاستثمار في الصناعات المعدنية عشان تحقق التكامل الاقتصادي وتحول الخساير لأرباح، وكمان تدعم جهود الدولة في تحقيق التنمية المستدامة.
وحاليا الحكومة المصرية بتعول على شركات قطاع الأعمال خاصة الشركات اللي كانت رائدة في الصناعات زمان، عشان ترجعها لمجدها من جديد وتستفيد من إمكانياتها الفنية وكوادرها البشرية، عشان تكون ترس مهم جدا في تطوير قطاع الصناعة في مصر.
وزي شركة النصر للسيارات، فقريب أوى هنشوف شركة مصر للألومنيوم واحدة من أكبر وأكتر الشركات الرابحة اقتصاديا، واللي هتقدر تجذب أكبر عدد من المستثمرين سواء المحليين أو الأجانب، عشان نكون نفذنا خطة التطوير بحذافيرها.
