أخبار سارة عن المرتبات في 2025.. شوف الحد الأدنى للأجور متوقع يوصل كام في 2025
يا ترى امتى الحكومة المصرية هتطبق الحد الأدنى للأجور، هل هيكون مع بداية السنة الجديدة 2025 ولا هيتأخر شوية، وهيكون الحد الأدنى كام جنيه، وهل هيكون لموظفين الحكومة بس ولا كمان للقطاع الخاص.. هنقولك كل التفاصيل في الفيديو ده فتابعنا للآخر.
في الأيام الأخيرة، زاد الكلام عن قرب تطبيق الحكومة المصرية لقرار الحد الأدنى للأجور خاصة مع بداية سنة 2025، فكل التوقعات بتقول إن التطبيق هيكون قريب جدا.
عشان كده، قال مجدي البدوي نائب رئيس اتحاد عمال مصر، إن القانون بيشمل تطبيق زيادات محددة كل سنة للموظفين، وقال إن في حزمة حماية اجتماعية جديدة هتطبقها الحكومة في الفترة الجاية.
كمان، "البدوي" لمح بقرب تطبيق الحد الأدنى للأجور اللي هيوصل ل 7 آلاف جنيه في السنة المالية الجديدة وتحديدا في شهر يوليو 2025، أما بالنسبة للي شغالين بالقطاع الخاص فيهزيدوا هما كمان، وهيحصلوا على علاوة دورية حددها المجلس القومي للأجور بـ3% من الأجر التأميني.
أما العاملين في الجهاز الإداري بالدولة، فهيحصلوا هم كمان على العلاوة دي على مرتب شهر يوليو، لأن الموازنة العامة للدولة هتبدأ من الشهر ده.
ومتوقع زي ما قولنا، رفع الحد الأدنى للأجور إلى 7000 جنيه، يعني هيتم تطبيق حزمة اجتماعية هتكون في حدود 1000 جنيه، عشان يرتفع الحد الأدنى للأجور من 6000 إلى 7000 جنيه، وهيكون الاهتمام بالدرجة الأولى في الحزمة دي بأصحاب الحد الأدنى للأجور وأصحاب المعاشات والمستفيدين من معاشات "تكافل وكرامة".
يعني الكلام دع معناه إن سنة 2025 جاية ومعاها بشرى سعيدة للملايين من الموظفين والعاملين في القطاعين الحكومي والخاص، لأن المرتبات والأجور هتشهد زيادات لصالح أكثر من 5 مليون موظف في الجهاز الإداري للدولة، والهيئات الاقتصادية، بالإضافة لأكثر من 12 مليون عامل في القطاع الخاص.
وطبعا الزيادة دي جاية تماشيا مع التوجيهات المستمرة للرئيس عبدالفتاح السيسي، بتوفير حماية اجتماعية للمواطنين المصريين، وتعزيز قدرتهم على مواجهة الأزمات الاقتصادية العالمية، والتحديات المحلية.
عشان كده، متوقع تكون الزيادة حسب الدرجة الوظيفية لكل موظف، وهتشمل الزيادة العلاوات الدورية والعلاوة الاستثنائية، بجانب زيادة حوافز غلاء المعيشة.
ونقدر نقول، إن آخر زيادة للموظفين كانت في مارس 2024، وزاد الحد الأدنى للأجور من 4000 إلى 6000 جنيه للدرجة السادسة، وكان قبلها كمان زاد في سبتمبر 2023 من 3000 جنيه إلى 4000 جنيه، عشان كده متوقع إنه يزيد في يوليو 2025 عشان يوصل ل 7 آلاف جنيه، واللي طبعا هتكون خطوة مهمة جدا لتحسين الوضع المعيشي للمواطنين، وهتيجي في توقيت حساس عشان يدعم الأسر المصرية في مواجهة التحديات الاقتصادية وارتفاع أسعار السلع.
