الحارس الأمين في أوقات الشدة.. إزاي البنك المركزي بيحمي اقتصاد البلد
لما الأزمات الاقتصادية تضرب.. مين بيقف في ضهر البلد؟ ومين اللي بيحمي فلوسك وقيمة الجنيه قدام التضخم وانخفاض الدولار؟إزاي الاقتصاد ما بيقعش حتى في أصعب الأزمات؟ وإزاي قرارات البنك المركزي ممكن تغيّر شكل الاقتصاد وتساعد في استقراره؟ وهل فعلاً فيه خطة واضحة لتحجيم التضخم وحماية الجنيه؟
في وقت الأزمات الاقتصادية الكبرى .. لما الأسعار بتغلى والجنيه بيتأثر والناس بتتسائل "هنعمل إيه؟.. هنا بيظهر دور البنك المركزي المصري.. باعتباره الدرع اللي بيحمي الاقتصاد واللي قراراته بتأثر بشكل مباشر على حياتنا اليومية.
طب إزاي البنك المركزي بيشتغل؟ وإيه دوره الحقيقي؟ وليه دايماً بنقول إنه "الحارس الأمين" في أوقات الشدة؟
البنك المركزي مسؤول عن إدارة السياسة النقدية.. وده يعني إنه بيحدد اتجاه الاقتصاد سواء بالتحكم في أسعار الفايدة أو إدارة سعر الجنيه قدام العملات التانية.. أو حتى حماية الاحتياطي النقدي للبلد.
وتعالوا نوضح الدور ده أكتر
السياسات النقدية بتعتبر أداة الإنقاذ الأولى اللى بيستخدمها المركزي وصناع السياسة النقدية لمواجهة التضخم.. ولما الأسعار بتبدأ تزيد بشكل كبير البنك المركزي بيتدخل عن طريق رفع سعر الفائدة.. عشان يقلل السيولة في السوق ةيخلي الناس توفر بدل ما تصرف.. وده يقلل الضغط على الأسعار زي ما حصل الفترة اللي فاتت لما التضخم كان في أعلى مستوياته.. وقتها المركزي رفع الفائدة أكتر من مرة عشان يسيطر على الوضع.
ولأن الجنيه المصري بيواجه تحديات خصوصاً مع نقص الدولار.. البنك المركزي بيتدخل لإدارة الاحتياطي الأجنبي وضمان توفير العملة الصعبة للضروريات زي الأدوية والوقود والأكل .. وده حصل لما المركزي ركز على دعم الاحتياطي النقدي اللي وصل لأكتر من 46 مليار دولار في 2024 وده ساعد في تهدئة السوق وفضة تماما على السوق السودا للعملة.
وعشان يشجع الاستثمار المحلي والأجنبي البنك المركزي بيدير سياسات تشجع على ضخ السيولة في السوق.. وفي نفس الوقت يضمن استقرار الأسعار.. وده واضح في دعمه للبنوك لتقديم برامج تمويلية ميسّرة للشركات الناشئة والصغيرة.
وخد بالك .. الأزمات مش بس أرقام.. دي تحديات بتأثر على كل بيت في مصر. وهنا بيظهر البنك المركزي كداعم أساسي.. في أزمة كورونا مثلا البنك أطلق مبادرات لدعم القطاعات المتضررة زي السياحة والصناعة وده حافظ على آلاف الوظايف.. ووقت الحرب الروسية الأوكرانية اللي أثرت على سلاسل الإمداد ورفعت الأسعار البنك المركزي اتدخل عشان يضمن استقرار السوق.
وفى الفترة الأخيرة المركزي أعلن عن خطوات جريئة زي تمديد أفق التضخم المستهدف لحد 2028 وده معناه إنه شغال بخطة طويلة المدى لتحقيق استقرار اقتصادي حقيقي.. وكمان تقديم تسهيلات للبنوك عشان تطرح منتجات ادخارية بفوايد مرنة تناسب التغيرات في السوق.
طب ليه البنك المركزي بيعتبر الحارس الأمين ؟
لأن البنك المركزي ببساطة شغال على أهداف استراتيجية واضحة وكبيرة وبتمثل عصب الاقتصاد زي حماية الجنيه ومواجهة التضخم وتوفير استقرار مالي يضمن إن الاقتصاد يقدر يواجه أي أزمة.
