الحق قبل المدة ماتخلص.. خدمات بنكية متميزة ببلاش

البنوك في مصر دلوقتي بتقدم خدمات مجانية لعملائها وغير عملائها، وده بمناسبة مبادرات الشمول المالي اللي أطلقها البنك المركزي المصري، كوسيلة لتحقيق الاستقرار المالي، وتحسين جودة الحياة.

ومن ضمن الخدمات المجانية اللي تقدمها البنوك، واللي بدأت في شهر أكتوبر الجاري وبتستمر لحد نهاية الشهر بمناسبة الاحتفال بالأسبوع العالمي للشمول المالي واليوم العالمي للادخار، هي إمكانية فتح حساب جاري، أو توفير دون رسوم، وبدون حد أدنى لفتح الحساب.

كمان من ضمن الخدمات المصرفية المجانية، استخراج بطاقة ميزة للخصم الفوري مجانا، وإصدار بطاقة ميزة المدفوعة مقدما مجانا.

ضيف على ده، فتح الحسابات مجانا، زي حساب شمول مالي للشركات النشاط الاقتصادي مجانا، وكمان إعفاء العملاء الأقل من 16 سنة من مصاريف إصدار البطاقة المدفوعة مقدما ضمن برنامج الشباب.

قايمة المجان، بتشمل بردو فتح الحساب مجانا بدون الحاجة إلى موافقة ولى الأمر للعملاء من 16 سنة إلى 21 سنة.

وبمناسبة البطاقات، فمتاح إصدار بطاقات الخصم الفوري مجانا ضمن برنامج الشباب، وإصدار بطاقة الخصم الفوري مجانا مع الإعفاء من المصاريف، وكمان إصدار البطاقة الائتمانية في حالة الحصول على قرض شخصي.

فلو حضرتك في احتياج لخدمة من الخدمات دي، فالحق روح مشوارك للبنك اللي تحبه واحصل على الخدمة المجانية من غير ولا مليم، قبل انتهاء العروض المجانية.