خطوة ممكن تقضي على أزمة الدولار نهائيا.. السيسي أكد عليها في اجتماع مع بوتين
هل العملات المحلية فعلاً ممكن تكون الحل لأزمة الدولار؟ وإزاي مصر ممكن تستفيد من تعزيز التبادل التجاري بالعملات المحلية؟ وهل ممكن الخطوة دي تغير شكل الاقتصاد المصري؟"كل الأسئلة دي وغيرها هنحاول نجاوب عليها النهاردة بعد لقاء السيسي والرئيس الروسي بوتين في قمة بريكس اللي اتعقدت في مدينة قازان الروسية وطلب السيسي تعزيز التبادل التجاري بالعملات المحلية بين الدول أعضاء بريكس
النهاردة كان فيه لقاء مهم جداً على هامش قمة بريكس اللي بتعقد في مدينة قازان الروسية.. الرئيس السيسي اجتمع بالرئيس الروسي بوتين واتكلموا في حاجات كتير بس اللي لفت الانتباه كان التركيز على تعزيز التبادل التجاري بالعملات المحلية
طب إيه موضوع التبادل بالعملات المحلية ده؟
ببساطة بدل ما الدول تعتمد بشكل كبير على الدولار في التبادل التجاري بيكون فيه اتفاقيات إنهم يتعاملوا بالعملات المحلية بتاعتهم.. يعني مثلاً مصر وروسيا يتبادلوا السلع والخدمات بالجنيه المصري والروبل الروسي بدون الحاجة للدولار.. والسيسي في كلمته النهاردة اتكلم بشكل واضح وقال إن مصر بتدعم فكرة تبادل العملات المحلية بين دول تجمع بريكس وإنه شايف إن الخطوة دي ممكن تحل جزء كبير من أزمة الدولار اللي مصر بتمر بيها بقالها فترة
السؤال اللي ممكن أي حد يسأله دلوقتي هو ليه العملات المحلية؟ وإيه اللي هيخلي الفكرة دي تنجح؟
فيه أكتر من سبب للاعتماد على العملات المحلية اولها ان استخدامها بيقلل الضغط على احتياطيات النقد الأجنبي..و في الفترة الأخيرة مصر واجهت أزمة كبيرة في توفير الدولار واللي أثر على استيراد السلع الأساسية ورفع الأسعار.
الفكرة إن لو مصر وروسيا (أو أي دولة تانية من دول بريكس) اتفقوا إنهم يتعاملوا بالجنيه والروبل مثلاً مش هيبقى فيه ضغط على الدولار وبالتالي الاحتياطي النقدي هيكون في أمان.
كمان التبادل بالعملات المحلية ممكن يسهل عملية التبادل التجاري ويخفض التكلفة.. تخيل إنك كل مرة تروح تبدل العملة عشان تستورد أو تصدر فيه تكاليف بتضاف على العمليات دي لو الدول اتعاملت بالعملات المحلية، التكاليف دي هتنخفض.
وقمة بريكس اللي بتضم روسيا، الصين، البرازيل، الهند، وجنوب أفريقيا وانضم اليهم أعصضاء جددمن بينهم مصر بقت واحدة من أهم التكتلات الاقتصادية في العالم.. الدول دي بتمثل جزء كبير من الاقتصاد العالمي ودلوقتي في توجه إنها تتعامل مع بعضها بعيد عن الدولار.. وفي لقاء النهاردة السيسي كان واضح إنه عايز يكون فيه دور أكبر لمصر في التكتل ده..و الفترة الأخيرة مصر بقت مهتمة إنها تقوي علاقتها بدول بريكس وتشارك في المبادرات اللي بيطرحوها وخصوصاً المبادرات اللي بتحاول تقلل الاعتماد على الدولار.
الاجتماع بين السيسي وبوتين كمان ركز على تعزيز التبادل التجاري بين البلدين وده معناه إن في الفترة الجاية ممكن نشوف اتفاقيات جديدة بين مصر وروسيا لتبادل السلع والخدمات بالعملات المحلية.
طب ايه الللى مانع تنفيذ فكرة التبادل بالعملات المحلية أو مأخرة تنفيذها؟
زي أي فكرة جديدة فيه تحديات بتواجه تنفيذ التبادل بالعملات المحلية أهم تحدي هو إن العملات المحلية نفسها ممكن ما تكونش مستقرة.. يعني لو العملة المحلية بتتأثر بتقلبات كبيرة ده ممكن يكون خطر على التجارة بالإضافة إن لسه فيه كتير من الدول اللي بتفضل التعامل بالدولار باعتباره العملة الدولية الأساسية.
