علشان متدفعش فلوس وخلاص.. شوف خطوات اغلاق الحسابات الراكدة بالبنوك
كتير منا عندهم حسابات في البنوك ومش بيستخدموها، واكثرنا ميعرفش أن الحسابات دي بتكون عليها مصاريف إدارية ولازم تدفعها لو انت مقفلتش الحساب.. لو عايز تعرف ازاي تقفل حسابك البنكي وتخلص من المصاريف الإدارية اللي ممكن تكثر عليك اقرأ التقرير ده للآخر
في ناس كتير خصوصا من المواطنين واصحاب المهن الحرة بيفاجي انه مديون لبنك معين كان عميل فيه قبل كده، وعلشان يقضي خدمة ما في البنك ده أو يعمل قرض منه لازم يسدد المصاريف والفلوس اللي عليه وبيفاجئ أنه الفلوس دي سببها أنه كان له حساب جاري في البنك ومقفلهوش وللاسف الحساب فضل شغال وترتب عليه مصاريف إدارية كتيرة ولازم يسددها .
طيب اعمل اية لو عندي حساب في البنك ومش بستعمله وعايز اقفله؟.
لو عندك حساب ومش عايزة وعايز تقفله، هيكون في كام خطوة لازم تعملها علشان تقفل الحساب ده وأولها أنك لازم تروح بنفسك أو حد معاه توكيل رسمي منك لواحد من فروع البنك اللي انت تابع له وتقابل حد من ممثلي خدمة العملاء، وتطلب قفل حسابك، وتعرفهم اية الاسباب اللي هتخليك تقف الحساب، وموظف خدمة العملاء هيطلب منك اللي يثبت أن الحساب بتاعك عايز تقفله وسببه اية وبعد ما يتأكد من كلامح وصحة المستندات ويطلع علي تحقيق إثبات الشخصية، هيقفل الحساب بتاعك فورا بعد ما تدفع الفلوس بتاع الخدمات الإدارية لو كانت موجودة عليه .
البنك المركزي وجه البنوك العاملة في مصر بأغلاق اي حساب راكب لمدة عام، والحساب الراكد ده هو حساب متمش عليه اي إجراء سواء معاملات السحب أو الإيداع أو التحويل أو حتي الاستعلام الإلكتروني أو الموثق عن الرصيد، لمدة سنة كاملة وده بالنسبة للحسابات الجارية وحسابات الهاتف المحمول.
البنك المركزي حدد كمان سنتين لإغلاق حسابات التوفير الخاصة بالعملاء، وفي الحالة دي البنوك مش بتعتبر المعاملات اللي بيقوم بها البنك على حسابات العملاء زي خصم الرسوم أو إضافة الفوايد من المعاملات اللي علي اساسها بيتم تنشيط الحساب، ولازم المواطن هو اللي يعمل خطوات تنشيط الحساب بنفسه سواء سحب أو إيداع أو حتي استعلام علشان الحساب يفضل شغال .
