هنصدر لأمريكا وأوروبا.. حكاية المشروع البولندي في العلمين

يا ترى إيه قصة مجمع الأثاث اللى بتفكر الحكومة تعمله دلوقتي في العلمين الجديدة، وليه اختارت العلمين تحديدا للمشروع ده، وإيه هي الجدوى الاقتصادية منه والجهة اللي هتنفذه وفي قد إيه.. هنقولك كل التفاصيل..

انهاردة، الفريق مهندس كامل الوزير نائب رئيس مجلس الوزراء للتنمية الصناعية وزير الصناعة والنقل، التقى وفد من شركة بادما البولندية المتخصصة في تصنيع الأثاث المنزلي، وده كان عشان يبحث خطة الشركة لضخ استثمارات بالسوق المصري في تصنيع منتجات الأثاث.

والخطة دي هتترجم في إنشاء مجمع صناعي ضخم بمدينة العلمين الجديدة على مساحة 400 ألف متر وباستثمارات تبلغ 70 مليون يورو لإنتاج الأثاث للتصدير لأسواق أوروبا وأمريكا.

ومن هنا، الوزير وعد بتقديم كل أوجه الدعم الممكنة للشركة واللي هتشمل تسريع إجراءات استخراج التراخيص الصناعية، كمان وجه الوزير بالتنسيق مع الهيئة العامة للاستثمار والمناطق الحرة لسرعة إنهاء إجراءات تأسيس الشركة بنظام المناطق الحرة الخاصة.

كل ده هيتكلف حوالي 70 مليون يورو، وفي ظل الدعم غير المسبوق اللي بيقدمه الفريق كامل الوزير والتيسيرات اللي حصلت عليها الشركة من الهيئة العامة للتنمية الصناعية فيما يخص إجراءات تخصيص الأرض الصناعية لإقامة المشروع وكمان دعم هيئة المجتمعات العمرانية والهيئة العامة للاستثمار، فالمشروع هيكون على أرض الواقع قريب جدا.

وبالنسبة للشركة البولندية، فهتصنع الأبواب وتجاليد الحوائط وأرضيات MDF والديكورات، وكلف الوزير مركز تحديث الصناعة بعمل حصر بمصانع إنتاج خشب MDF في مصر اللي يمكن التنسيق بينها وبين الشركة البولندية لتوريد خامات الأخشاب والمواد الخام اللازمة لتصنيع الأثاث، يعني الشركة دي هتستفيد من موقع المصنع في توريد منتجاتها لمدينة العلمين الجديدة والمناطق السياحية المحيطة بها، ونستهدف تحقيق 200 مليون يورو صادرات لأمريكا وأوروبا وكل دول العالم.

كمان، أكد الوزير أهمية استفادة الشركة من المقومات الاستثمارية الكبيرة بالسوق المصري اللي بتشمل التيسيرات والبنية التحتية من موانئ وطرق ومرافق خاصة، خاصة وأخ مدينة العلمين الجديدة بتعتبر من أهم المدن الواعدة في مجالات الصناعة والسياحة.