ليه دلوقتي الوقت المناسب لشراء الدهب.. هنقولك على السر

الحياة فرص والقرش صياد زي ما بيقول المصريين والاستثمار بقي ضروري دلوقتي وأفضل من الادخار بكتير لأن الاستثمار معناه فلوسك بتزيد وبتعوض اي نقص في قيمتها .. تعالى نقولك ليه الدهب دلوقتي أفضل استثمار وليه هتندم لو مشترتش.. خليك معانا للآخر وهتعرفوا التفاصيل 
 
معروف إن الدهب واحد من أفضل تلات استثمارات في السوق المصري دلوقتي بجانب العقارات وشهادات الادخار في البنوك لكن الدهب والعقار استثمار طويل الأجل نسبيا يعني عشان تكسب كويس فيهم لازم تصبر على البيع 3 سنين على الأقل.. طيب ليه احنا بنقول الدهب هو الافضل دلوقتي لو هتشغل فلوسك وتستغل مدخراتك.. اولا زي ما قلنا في الأول انك بتحفظ قيمة فلوسك وتاني سبب عشان كل التوقعات العالمية بتقول إن الدهب هيزيد بشكل كبير في الأجل المتوسط وده لأسباب كتير بردو لأن مفيش توقعات من غير بيانات ودراسة سوق ومعطيات.
أول الأسباب لتوقعات ارتفاع أسعار الدهب عالميا هو اتجاه بنك الاحتياط الفيدرالي الأمريكي لخفض الفائدة في اجتماعه الجاي في يونيه ومعنى خفض الفايدة على الدولار إن سعر الدهب هيرفع لأن وقتها الطلب عليه هيزيد من البنوك المركزية العالمية لتعويض الخسارة في الدولار في احتياطياتها من العملة الأمريكية وزي ما احنا عارفين إن الدهب عكس الدولار في معادلات السوق يعني لو الدولار زاد يبقي الدهب بينزل والعكس صحيح.. وتاني سبب وهو إن فعلاً فيه طلب كبير جدا من البنوك المركزية لتخزين الدهب واخر احصائيات بتقول إن مشتريات المعدن الأصفر سجلت أرقام قياسية ووصلت 1081 طن وخاصة من المركزي الصيني وده بسبب الخوف من مستقبل الدولار وعشان كمان استخدام واشنطن للدولار كأداة للعقوبات ضد الصين وروسيا واي دولة تعارض مصالحها التجارية أو السياسية.
طيب التوقعات بتقول إيه.. اغلب المؤسسات المالية الدولية توقعت أن اونصة الدهب هتوصل 3 آلاف دولار بفعل كل العوامل اللي قلنا عليها ومحليا بقي وده اللي يهمنا فالتوقعات بتقول إنه على الأرجح سيتوجه الدهب خلال الفترة القريبة الجاية لنقطة الـ 4 آلاف جنيه للجرام الواحد، وتوقعات تشير باستقراره عند  5 آلاف جنيه بنهاية السنة يعني مقارنة بسعر النهاردة هتكون الزيادة حوالي الفين جنيه مرة واحدة وشوف لما تكسب الفين جنيه في الجرام الواحد هتكسب كام.
عشان كده بنقولك أن الوقت الحالي هو المناسب لشراء الدهب دلوقتي لأن الصاغة عندنا بترتبط بردو بالاسعار العالمية وسعر الدولار بجانب حالة العرض والطلب على المعدن الأصفر.