فيه عفاريت في الصناديق .. لعبة الإخوان الخبيثة لتشويه الانتخابات المصرية

النهاردة مصر كلها بتفرح باللي بيحصل في الانتخابات المصرية  لكن فيه فصيل واحد مش فرحان لمصر وكلنا عارفينه وكل هدفه يشوه اللي بيحصل في البلد بخصوص أي إنجاز.. تعالوا نشوف الإخوان عملوا إيه النهاردة 
 

من سنين طويلة موقف الإخوان المحظورة معروف من البلد ومن المصريين وكل همهم إنهم ينتقموا من الشعب اللي رفض حكمهم بسبب الخيانة وبيع البلد وعلى مدار السنين اللي فاتت نشط الإعلام الإخواني في تشويه إنجازات الدولة المصرية وكان كل تركيزه على سلبيات بتحصل في كل دول العالم لكن مصر بالذات عليها كلام تاني... شفنا إزاي الإعلام الإخواني بينشط في الكوارث والأزمات وشفنا ازاي استغلوا الأزمة الاقتصادية الأخيرة رغم إن كل العالم بيمر بيها وحاولوا يصوروا للناس إن فيه ثورة في الشارع وإن الناس مش لاقية تاكل ومشافوش اللي بيحصل في الدول اللي حوالينا.
وقبلها اشتغلت كتائب الإخوان على الدولار وتجارة العملة وإزاي الحكومة عاجزة عن توفير فلوس استيراد السلع وإن البلد مش هتلاقي موازنة للدولة، ودا غير فبركة الفيديوهات والنفخ في الأزمات واستغلالها أسوأ استغلال،.. لكن مصر ولا عملت للإخوان اعتبار واستمرت في طريقها.
النهاردة مصر عندها أهم حدث سياسي واقتصادي كمان وهو  الانتخابات الرئاسية وعشان الإخوان عارفين كويس المصريين اختاروا مين طلعوا بقي يشوهوا المشهد واتهموا كل المصريين اللي راحو الانتخابات النهاردة إنهم مرتشين وواخدين فلوس وجابوا ناس من بعيد تقول خدنا فلوس رغم إن الفيديوهات مش متصورة جمب اللجان لكن فبركة الإخوان مش بتخسر.
وفي نفس الوقت طلع الإعلام الإخواني واللي معاهم وقالوا إن اللجان فاضية والناس ملهاش نفس تطلع بسبب الظروف الاقتصادية وبعدين رجعوا قالوا إن الناس خرجت تصوت بالأمر وكله كلام عكس بعضه ومش لاقيين حاجة يقولوها عشان يشوهوا الانتخابات واختيار المصرييين من جديد للرئيس السيسي عشان يكمل اللي بناه ولأنه عدو الإخوان الأول فطبعا أهل الشر عاوزين يصوروا للعالم إن الانتخابات في مصر موجهة ومدفوعة ومشافوش الاشراف القضائي ولا ازاي الناخب بيصوت مع نفسه من ورا الستارة ويحط ورقته في الصندوق لكن فكرهم المريض بيصورلهم إن فيه عفاريت في الصناديق بتصوت للسيسي وبكده الإخوان وصلت لحالة الهزيان لانها عارفة ملهاش رجعة في مصر تاني.