كلمتين ولافتة خلصوا الحكاية.. مدبولي يكشف نوايا السيسي والسر الأعظم في العريش

 
الدكتور مصطفى مدبولي النهاردة أدى درس في قوة وثقة الدولة المصرية والعقلية الجديدة اللي بتتكلم بيها وأنها دولة كبيرة جدا جدا ومفيش حاجة تهزها.. ايه اللي حصل مع رئيس الحكومة في شمال سيناء وسر توقيت الزيارة وايه حكاية اللافتة اللي كانت وراه وايه الكلمتين اللي قالهم واللي كشفوا الرئيس السيسي بيفكر ازاي عشان سيناء وازاي سبق المخطط الإسرائيلي الأمريكي بسنين.

زي ما كلنا تابعنا على الهواء مباشرة زيارة الدكتور مصطفى مدبولي رئيس الوزراء لمحافظة شمال سيناء والحضور الكبير من عواقل القبائل والصحفيين والفنانين والصحفيين ومراسلي وكالات الأنباء الأجانب والحقيقة المشهد كان مبهر جدا عشان حاجتين مهمين.. أولها إن الزيارة بيم في ظروف صعبة جدا وصراع مشتعل  على بعد كام كيلو من مكان مؤتمر  رئيس الحكومة..والحاجة التانية هي الدكتور مصطفى مدبولي نفسه والثقة والترتيب والطريقة والحماس والاحترام والرصانة اللي بيتكلم بيها بيخليك تقتنع قد ايه الراجل دا بيشتغل بقلبه وحافظ كل رقم وعارف مكان كل مشروع في مصر مش في شمال سيناء بس..

لغة مدبولي والأرقام اللي قالها بتكشف حجم الجهد الرهيب في سيناء واللي شغال من ساعة ما تولي الرئيس السيسي المسؤولية وازاي السيسي كان عارف بالمخاطر اللي هتتعرضلها سيناء بعد الانتهاء من الحرب على الإرهاب.. والدكتور مدبولي قال كلام كتير وأرقام اكتر ومشروعات على أرض الواقع لكن المهم جدا في الزيارة هي توقيتها وذكاء الراجل اللي بيقود البلد إن سيناء هتكون هي المستقبل واي أطماع فيها بقت من الماضي ومحاولة استهدافها انتحار بكل المقاييس والعالم كله شاف على الهواء مباشره ايه اللي بيعمله السيسي في سيناء والرسالة وصلت.

لكن حاجتين لفتوا الإنتباه جدا ومحدش خد. باله منهم كتير أولها هي الشعار اللي كان مكتوب على الجدار خلف الدكتور مصطفى مدبولي وهو بيتكلم ويشرح حجم الانجازات في شمال سيناء والخطط المستقبلية وكان مكتوب عليه النصر أو الشهادة واكيد الرسالة وصلت للطرف المقصود وهي إن مصر مش بتسيب أرضها إلا بطلوع الروح وإن الجيش المصري مايعرفش في عقيدته غير الحاجتين دول النصر أو الشهادة.

تاني حاجة مهمة قالها مدبولي وبتدلل على مستقبل سيناء والاقتصاد المصري كله في السنين الجاية ويقول إن اقتصادنا هيكون رقم واحد في المنطقة والسابع عالمياً في السنين الجاية من غير مبالغة وهو. إن الساحل الشمالي لمحافظة شمال سيناء كله هيكون زي الساحل الشمالي الغربي في العلمين ومطروح ومارينا..حضرتك متخيل حجم وقوة وعوائد المشروع دا بس إن يكون عندك ساحل شمالي تاني بمنشآته ومشروعاته السياحية والخدمية والتجارية في أهم وانقى شواطئ في العالم وهي شواطئ شمال سيناء طبعا دا مشروع بعشرات المليارات من الدولارات والرقم مش مبالغة انت بتعمل تنمية مختلفة على طول الشاطئ وبعمق لا يقل عن 20 كيلو في الظهير الصحراوي يعني بتتكلم عن بلد تانية بتتبني وقيمة مضافة مهزلة للاقتصاد المصري.

تاني حاجة قالها مدبولي هتغير شكل الاقتصاد العالمي في المنطقة هو مشروع الميناء العالمي في العريش واللي هيام ربطه بشبكة سكة حديد عملاقة  مرتبطة بالدول المجاورة وهتكون مخصصة للتجارة ونقل البضائع من الشرق لجنوب أوروبا وهيكون مركز تجاري عالمي في المنطقة وهي دي ميزة الموقع الجغرافي لمصر أنها تسيطر على التجارة في المنطقة الهامة من العالم، وبتقول إن مصر بتفكر لعشرات السنين لقدام ولا فارق معاها أزمة دولار خايبة أيام وهتنتهي ولا تقارير سلبية ولا اراء مدفوعة لأنها دولة عميقة عارفة بتعمل إيه كويس.