نكسة الدولار في السوق السوداء.. صدمة في تعاملات اليوم

 
فيه حالة صراع رهيب بين السوق السوداء للدولار وبين الأجهزة الرسمية والرقابية في الدولة واللي بتحاول تحاصر تجارة العملة والمضاربات على الدولار ولأنها سياسة النفس الطويل كل يوم فيه جديد.. ايه اللي حصل نهاردة  في السوق السوداء للدولار وليه تجار العملة مرعوبين من الخسائر اللي هتحصلهم بسبب مؤشر الأسعار
 
على مدار الأسبوع الماضي وبداية الحالي سوق الدولار السوداء، عايشة حالة انهيار وخساير كبيرة من ساعة مؤتمر الدكتور مصطفي مدبولي رئيس الوزراء واعلانه عن صفقات برنامج الطروحات الحكومية وكمان توافر الدولار بسبب قفزات السياحة والتصدير وقناة السويس والاستثمار وغيرها وإن مصر هتوفر 191 مليار دولار موارد سنوية خلال 3 سنين وطبعا الكلام دا نزل زي الصاعقة على تجار العملة واللي بيعيشوا على فكرة نقص الدولار في السوق وبكده هتضربهم خساير فادحة واللي بتزيد كل يوم بسبب نزول السعر.
النهاردة الأربعاء وفي التدوالات السرية في السوق الموازية للدولار حصلت مفاجأة وهي إن سعر الدولار نزل بشكل كبير ووصل لمتوسط 35 و36 جنيه للدولار الواحد، وسط توقعات من تجار السوق نفسهم باستمرار التراجع في الأيام الجاية ، ودا بيمثل ضربة موجعة لتجار العملة بالسوق الموزاية، واللي بيحاولوا يتخلصوا من مخزون الدولار اللي عندهم قبل الخساير ما تزيد.
الأهم من خسارة تجار العملة في سوق السودا هو قلة الطلب عليها وإن المتعاملين شافوا إنها خطر وفي نفس الوقت معادش فيه مشكلة كبيرة زي زمان، وأي حد يقدر ياخد دولار من البنوك دلوقتي ويحول بطريقة شرعية، ولأن السوق السودا بتعيش دلوقتي حلاوة روح، هنلاقي الأيام أسعار الدولار في النازل أكتر.
اللي حصل نهاردة في السوق الموازية بيأكد إن الدولة قدر تنتصر لغاية دلوقتي في صراعها الطويل مع التجار والمضاربين في العملة، وقريب جدا هتكون فيه ضربة قاضية للسوق السودا الحكومة بتحضرها وهتعلنها في وقتها، ولغاية ما دا يحصل السوق هتستمر في الانهيار الذاتي  وساعها التجار مش هيلاقي مكان يصرفوا فيه الدولار اللي اشتروه بالغالي.