السر الخفي لارتفاع الدواجن

الكلام اللي هنقوله جايز يظهر غريب على اللي بيقولوه الناس أو المسئولين وواعي تقولي إن الـ50 ألف طن فراخ مستوردة هي اللي حلت الأزمة اللي حيرت المصريين في قصة ارتفاع أسعار الدواجن.. الموضوع ملهوش علاقة بالاستيراد ولا الديك البرزايلي المجمد ولا الفرخة الهندي المسلوقة.. تعالوا نشوف الحقيقة فين ومين سبب الأزمة؟
فاااصل
كلنا طبعا تابعنا أزمة ارتفاع أسعار الفراخ واللي عدت الدولار من أول الكتكوت لغاية الديك الشركسي، والغريب في أزمة الدواجن إنها كلها ألغاز في ألغاز من أولها لأخرها.. ليه طيب.. لأن حضرتك مصر طول عمرها عندها اكتفاء ذاتي من الدواجن والبيض وطول عمرهم سعرهم معقول رغم الاستهلاك الضخم للمصريين.. 
اللي حصل إنه بسبب الحرب الروسية الأوكرانية وتعطل سلاسل الامداد والتجارة حول العالم ارتفعت أسعار الأعلاف وده شيء طبيعي وبناء عليه ارتفعت أسعار الفراخ في البداية وده طبيعي بردوا لكن الأسعاء بدأت تاخد كيرف عالي جدا وبشكل غريب ومش بيتناسب مع العرض والطلب، ومكانش حد فاهم حاجة لدرجة غن كيلو الفراخ كان بيزيد بالعشرة جنيه في اليوم الواحد والبانيه اللي كان ببلاش إلا ربع وصل سعره 200 جنيه،.. استمر الوضع على كده بين غضب الناس وتصريحات الحكومة ونفي الشعبة لغاية ما ظهر الحل في الفراخ البرازيلي المجمد وبعد الكلام عنها بأيام وبدأت تظهر في السوشيال ميديا وبدأت الأسعار تنزل بشدة لدرجة انها النهاردة نزلت 13 جنيه مرة واحدة في الكيلو.. وده بردوا من ضمن الألغاز والأسرار بتاعة أزمة الفراخ..
شوف حضرتك اوعي تفتكر إن كان فيه أزمة من الأول في فيلم الفراخ دا.. لأ.. مكنش في أزمة ولا حاجة وأسعارها كانت هتفضل معقولة من غير الاستيراد لكن الجشع والطمع والاستغلال والقسوة على المواطن ورا كل اللي حصل من أول صاحب المزرعة لحد التاجر الصغير اللي تحت البيت وكأنهم اتفقوا كلهم مع بعض كل واحد يرفع كام جنيه في الكيلو لغاية ما توصل المواطن العادي بسعر خيالي.. والدليل على كلامنا إن الفراخ البرازيلي ملحقتش تيجي بكل كمياتها وحتى لو جت اوعى تصدق إن الـ50 ألف طن من الدواجن المجمدة هي اللي حلت أزمة الأسعار، لأن الكمية مش كبيرة عشان تعدل المايلة في سوق زي السوق المصري، لكن السر الحقيقي في تراجع الأسعار كان خوف التجار ومافيا الفراخ من خسارتهم طالما الدولة كشفت اللعبة وقررت تستورد بأسعار رخيصة وفراخ كويسة، ولما الناس استغربت إزاي الفرخة اللي بتيجي من البرازيل أرخص من الفراخ المحلي وهنا التجار اتكسفوا على دمهم وقرروا يسيبوا السوق شوية وعشان كده رجعت أسعار زمان.. احنا بنخلق الأزمة واحنا بنسيبها تطول لما بنسيب التاجر يتحول لغول مابيرحمش، وعلى فكرة اللي حصل في مووضوع الدواجن هيتكرر في موضوع الأرز والدولة قررت تستورد كميات عشان التجار مايلوش دراعها واحنا داخلين على رمضان وبكرة تشوفوا الأسعار بتنزل إزاي.