واردات القمح في مصر على موعد مع التراجع بأكثر من 20%.. إيه السبب؟
أكتر من 20% تراجع متوقع في واردات مصر من القمح.. يعني مصر رايحة لتقليل اعتمادها على الاستيراد، والسبب المرة دي مرتبط بالمحصول المحلي.
وزارة الزراعة الأمريكية بتتوقع إن واردات مصر من القمح تنخفض لحوالي 12 مليون طن خلال موسم 2026/2027، بتراجع يقرب من 23% مقارنة بالموسم السابق.. لكن إيه اللي ورا التوقعات دي؟
أول سبب هو التوسع في زراعة القمح محليًا.. المساحات المزروعة وصلت لحوالي 3.7 مليون فدان خلال الموسم الأخير، وفيه خطط لزيادتها لأكتر من 4 ملايين فدان خلال الموسم الجديد.
السبب التاني هو زيادة الإنتاجية، من خلال استخدام أصناف قمح عالية الإنتاج، وتقاوي معتمدة، وتطوير أساليب الزراعة والري والتسميد، علشان الفدان الواحد يطلع محصول أكبر.
كمان الحكومة رفعت سعر توريد القمح المحلي لتشجيع الفلاحين على زراعة المحصول وتسليمه للدولة، وده ساهم في زيادة الكميات اللي دخلت منظومة التوريد، واللي وصلت لحوالي 5 ملايين طن خلال موسم 2026.
وفيه عامل مهم كمان، وهو الاستفادة من المخزونات المتاحة، بما يقلل الاحتياج لشراء كميات إضافية من الخارج.
لكن خلي بالك.. انخفاض الواردات مش معناه إن مصر استغنت عن القمح المستورد، لأن الاستهلاك المحلي لسه كبير، والإنتاج المحلي لوحده مش كفاية لتغطية كل الاحتياجات.
يعني زيادة الإنتاج المحلي وتحفيز الفلاحين على التوريد ممكن يساعدوا مصر تقلل فاتورة الاستيراد وتخفف تعرضها لتقلبات الأسعار العالمية.. لكن تحقيق التراجع المتوقع هيفضل مرتبط بحجم المحصول الفعلي واحتياجات السوق.
