عداد الكارت اتشال؟ 6 خطوات مهمة ترجع بيها حقك

لو عداد الكهرباء مسبق الدفع اترفَع منك، متقلقش.. فيه خطوات لازم تعملها بسرعة عشان تسوي موقفك ومتدخلش في إجراءات أكبر.

أول حاجة، اتوجه لهندسة أو شبكة الكهرباء التابعة للعقار، وقدم طلب تعرف منه سبب رفع العداد، واطلب الاطلاع على تقرير لجنة التفتيش.

لو السبب مديونية، تقدر تسدد المبلغ أو تطلب تقسيطه، ولو فيه مخالفة، لازم تسدد الغرامة المقررة، ولو شايف إن المخالفة أو قيمتها مش صحيحة، من حقك تتظلم.

وخلي بالك، رفع العداد مش معناه بالضرورة سرقة كهرباء، ممكن يكون بسبب توصيل الكهرباء لحد تاني، أو هدم وإعادة بناء العقار من غير إخطار الشركة، أو تراكم أقساط ومقايسات، أو حتى أسباب فنية.

ولما تروح، خد بطاقة الرقم القومي، وكارت الشحن، وآخر إيصال شحن لو موجود، ورقم العداد، وعقد الملكية أو الإيجار.

ومتسيبش العداد من غير شحن لفترات طويلة.