خبر يهم 60 مليون مواطن.. الفراخ هتبقي على بطاقة التموين؟

الفراخ هتنزل على بطاقة التموين؟، الخبر ده لو حصل فعلًا.. هيهم ملايين البيوت في مصر.

رئيس شعبة الدواجن عبد العزيز السيد أكد إن طرح الفراخ على بطاقات التموين فكرة مطروحة بالفعل، لكن لسه مفيش اتفاق نهائي على طريقة التنفيذ.

إحنا بنتكلم عن حوالي 23 مليون بطاقة تموينية، بيستفيد منها أكتر من 60 مليون مواطن.

ولو هنفترض إن كل مستفيد هياخد دجاجة واحدة في الأسبوع، فإحنا محتاجين كميات ضخمة جدًا من الدواجن، وده محتاج اتفاق مع الموردين، وتحديد الكميات، وتنظيم عمليات النقل والتوزيع.

وعشان كده، الموضوع محتاج دراسة وتنسيق بين كل الجهات قبل التطبيق.
وفيه اقتراح إن الدواجن تتطرح من خلال الجمعيات التعاونية، وتكون مذبوحة أو مجمدة بدل الحية.

وده ممكن يحقق أكتر من فايدة للمواطن؛ يوفر له منتج بسعر مناسب، وفي نفس الوقت يضمن رقابة صحية أفضل، لأن المجازر المرخصة بتطبق اشتراطات صحية ورقابية.

لكن حتى الآن، مفيش اتفاق نهائي مع الموردين، ومفيش قرار نهائي ببدء المنظومة.