صفقة بـ135 مليار جنيه.. الإمارات تقترب من توقيع صفقة جديدة في الساحل الشمالي
أرض لحد فترة قريبة كانت قيمتها كام مليار بس... دلوقتي ممكن تدخل في صفقة بـ135 مليار جنيه.
إحنا بنتكلم عن أرض الجفيرة في الساحل الشمالي الغربي، ومساحتها حوالي 642 فدان.
مصر بتتجه لإسناد تطوير الأرض دي لمستثمر إماراتي بنظام المشاركة في صفقة تقدر قيمتها بحوالي 135 مليار جنيه، أو 2.7 مليار دولار.
لكن الصفقة هنا مش مجرد بيع أرض وخلاص...المستثمر هيسدد قيمة الأرض على مدار 6 سنين وفي نفس الوقت هيبدأ تطوير مشروع سياحي وفندقي ضخم على الأرض.
والأهم الحكومة المصرية مش هتاخد فلوس الأرض بس.. الاتفاق المبدئي بيتكلم عن نظام مشاركة يخلي الحكومة تحصل سنويًا على نسبة تتراوح بين 20% و30% من عوائد المشروع بالإضافة لحصة عينية من الوحدات الفندقية اللي هتتعمل.
والمستثمر بالفعل دفع 100 مليون جنيه جدية حجز بعد ترسية المشروع عليه من حوالي شهرين
حاليًا الجهات الحكومية بتستكمل الإجراءات القانونية وصياغة العقود النهائية، تمهيدًا لتوقيع الاتفاق.
طيب إزاي أرض كانت قيمتها من كام سنة مجرد مليارات، وصلت للتقييم ده؟
هنا بقى القصة المهمة... قيمة أراضي المنطقة ارتفعت بشكل كبير خلال آخر سنتين، خصوصًا بعد الزخم الضخم اللي عمله مشروع رأس الحكمة القريب منها، ومع دخول استثمارات أجنبية وبدء مشروعات كبرى في المنطقة.
وده أعاد تسعير الأراضي المحيطة بالكامل.. واللافت كمان إن الحكومة كانت تلقت عروض من مستثمرين قطريين وإماراتيين قبل الاستقرار على العرض الإماراتي.
أما هوية المستثمر فلم يتم الإعلان عنها حتى الآن… والتوقعات إن الصفقة يتم الإعلان عنها رسميًا قبل نهاية 2026، مع التأكيد إن القيمة النهائية ونسب المشاركة ممكن تتغير قبل التوقيع النهائي.
