جهاز بيخلص رصيد عداد الكهرباء في الصيف.. ومعظم الناس سايباه شغال

لو عندك عداد كهرباء مسبق الدفع، وبتستغرب ليه الرصيد بيخلص بسرعة في الصيف، فالمفاجأة إن السبب ممكن يكون جهاز أنت أصلًا مش محتاجه دلوقتي.

الجهاز ده هو السخان الكهربائي.
ناس كتير بتسيبه موصل بالكهرباء 24 ساعة، على أساس إنه مش بيشتغل طالما محدش بيستخدم مياه سخنة، لكن الحقيقة غير كده.

السخان بيشتغل تلقائي كل ما حرارة المياه تقل، علشان يحافظ على درجة الحرارة اللي أنت محددها، وده معناه إنه بيسحب كهرباء على مدار اليوم حتى لو محدش فتح الحنفية.

ولو عايز توفر في استهلاك الكهرباء، افصل السخان تمامًا في الصيف، وشغله قبل الاستخدام بحوالي نصف ساعة فقط.

وكمان اضبط الثرموستات على 50 أو 60 درجة، واعمل له صيانة دورية لإزالة الترسبات، لأن تراكمها بيخليه يستهلك كهرباء أكتر.

خطوة بسيطة زي دي ممكن توفر جزء كبير من رصيد العداد، خصوصًا في شهور الصيف.