خطوة كبيرة للصناعة.. الصين تدخل مصر بمصنع إطارات ضخم في السخنة بـ190 مليون دولار

هل مصر هتبقى مركز إقليمي لصناعة إطارات السيارات؟، وليه الشركات الصينية بتتجه بقوة للاستثمار في مصر؟، وإيه أهمية مصنع لونج مارش الجديد للاقتصاد المصري؟، وهل المصنع ده هيقلل استيراد الإطارات من الخارج؟، وإزاي المنطقة الاقتصادية لقناة السويس بقت جاذبة للمستثمرين؟، وهل المشروع ده بداية لموجة جديدة من مصانع مكونات السيارات؟

في خطوة جديدة بتأكد أن مصر بقت واحدة من أهم الوجهات الصناعية في المنطقة، أعلنت شركة "لونج مارش" الصينية عن بدء إنشاء واحد من أكبر مصانع الإطارات في مصر داخل المنطقة الاقتصادية لقناة السويس، وتحديدًا في منطقة السخنة الصناعية.

المشروع الجديد مش مجرد مصنع عادي، لكنه استثمار ضخم قيمته حوالي 190 مليون دولار، وبيمثل إضافة قوية لقطاع الصناعات المغذية للسيارات اللي الدولة بتركز على توطينه خلال السنوات الأخيرة.

المصنع هيتم تنفيذه على مساحة ضخمة بتقرب من 200 ألف متر مربع داخل منطقة "تيدا مصر"، وهي واحدة من أكبر المناطق الصناعية اللي نجحت في جذب استثمارات أجنبية كبيرة خلال الفترة الأخيرة.

الأهم من كده أن المشروع هيوفر حوالي 1500 فرصة عمل مباشرة، وده معناه فرص شغل جديدة للشباب ودعم للنشاط الاقتصادي في المنطقة.

المشروع هيتنفذ على مرحلتين، المرحلة الأولى هتنتج حوالي 600 ألف إطار سنويًا للشاحنات والحافلات، لكن بعد اكتمال المرحلة الثانية، الطاقة الإنتاجية هتقفز بشكل كبير جدًا.

المصنع وقتها هيقدر ينتج مليون إطار سنويًا للشاحنات والحافلات، بالإضافة إلى 4.5 مليون إطار سنويًا لسيارات الركوب، يعني إجمالي الإنتاج هيصل لحوالي 5.5 مليون إطار كل سنة.

وده رقم ضخم جدًا، خصوصًا أن سوق السيارات المصري بيعتمد بشكل كبير على الإطارات المستوردة، وبالتالي وجود مصنع بالحجم ده هيساهم في تقليل فاتورة الاستيراد وتوفير احتياجات السوق المحلي.

لكن أهمية المشروع مش واقفة عند السوق المصري بس، كمان الموقع المميز للمصنع داخل المنطقة الاقتصادية لقناة السويس بيديله فرصة كبيرة للتصدير لأسواق أفريقيا والشرق الأوسط وحتى أوروبا، من خلال الموانئ والخدمات اللوجستية الحديثة الموجودة هناك.

اللافت كمان أن المصنع ده يعتبر أول مشروع يتم تدشينه على توسعات "تيدا مصر" الجديدة، واللي مساحتها وصلت لـ2.8 مليون متر مربع، والأهم أن كل المساحة الجديدة تقريبًا تم التعاقد عليها بالفعل، وده بيكشف حجم الإقبال الكبير من المستثمرين العالميين على المنطقة الاقتصادية لقناة السويس.

ووفقًا للبيانات الرسمية، المنطقة الاقتصادية بقت تضم أكتر من 210 مصانع شغالة بالفعل، بالإضافة إلى حوالي 180 مصنع تحت الإنشاء، يعني بنتكلم عن ما يقرب من 390 مشروع صناعي.. كمان الهيئة أعلنت إنها نجحت في جذب استثمارات بحوالي 16 مليار دولار خلال آخر 4 سنوات، منهم أكتر من 7 مليارات دولار خلال عام مالي واحد فقط.

اختيار شركة صينية بحجم "لونج مارش" لمصر كمركز إنتاج جديد مش قرار عشوائي، لكنه بيعكس الثقة المتزايدة في البنية التحتية المصرية، والموقع الجغرافي المميز، والتسهيلات اللي بقت الدولة بتقدمها للمستثمرين.