إنستاباي قلبها بنك في موبايلك.. 7 مميزات هتخليك تنزله فورا

لو لسه ما استخدمتش إنستاباي، يبقى ممكن تكون فايتك واحدة من أهم الخدمات المالية في مصر حاليًا.

التطبيق الخاضع لإشراف البنك المركزي بقى بيقدم مجموعة كبيرة من الخدمات اللي بتخليك تدير فلوسك من الموبايل في أي وقت وعلى مدار 24 ساعة.

من خلال إنستاباي تقدر تربط كل حساباتك البنكية في مكان واحد، وتحول فلوس بشكل فوري لأي حساب بنكي أو محفظة إلكترونية أو بطاقة ميزة. كمان عندك أكتر من طريقة للتحويل سواء برقم الموبايل أو رقم الحساب أو عنوان الدفع اللحظي.

التطبيق كمان بيسمح بدفع فواتير الكهرباء والمياه والغاز، وإرسال التبرعات بسهولة، بالإضافة لإمكانية طلب فلوس من أي شخص بشكل مباشر.

ولو عندك أكتر من حساب شخصي، تقدر تحول بينهم لحظيًا في ثواني، كمان تقدر تتابع حدود استخدامك اليومية والشهرية بكل شفافية.

أما التسجيل، فكل اللي عليك تحميل التطبيق، تأكيد رقم الموبايل المسجل بالبنك، إضافة بياناتك، واختيار رقم سري للمعاملات، وبعدها تبدأ استخدام الخدمة فورًا بكل سهولة وأمان.